Boluntarioak dira protagonista, Atzegiren kanpaina berrian. Beraien lana goraipatu eta balioan jarri nahi izan du elkarteak, kanpainaren bidez: «beraien lana eskertu nahi diegu, adimen desgaitasuna duten pertsonekin denbora partekatzen dutenei. Musutruk, beraien hobbyak partekatu eta hainbat esparrutan laguntzen duen jende asko dago».
Eta era berean, adin guztietako herritarrak animatu nahi dituzte kanpainarekin, «boluntario izan eta esperientzia ahaztezinak bizitzera».
Modu dibertigarri batean aurkeztu dute hori: orain modan dauden esperientzia kaxen antzera, lau kaxarekin luzatu diete gonbita, boluntario gisa bizipen ahaztezinak izateko, urritasuna duten pertsonekin. Bizipoza, Escapadas, Bienestar eta Bidelagun jarri diete izena, AtzegiXperience kanpainaren kaxa horiei, Atzegik boluntario izateko eskaintzen dituen era ezberdinak ezagutaraziz: «guztiek aurkituko dute beraien neurriko esperientzia, eta ziur ahaztezina izango dela».
Urritasuna dutenen eta boluntarioen testigantzak, Atzegiren webgunean
Bestalde, Atzegik aurreratu du atzegi.eus/xperience webgunean jasoko dituztela, adimen urritasuna dutenen testigantzak, boluntarioen laguntza jasotzeak daukan garrantzia ezagutzera emateko; eta baita boluntarioenak ere, beraien esperientzien berri emanez.
«Boluntarioei esker, beraien aisialdiaz gehiago gozatu dezakete, eta gizartean aktiboki parte hartu; horrek hobetzen du beraien gizarteratzea, azken batean», adierazi dute.