Bederatzi egun pasa dira Hernaniko igerilekua zabaldu zenetik. Herrian gehien erabiltzen den kirol instalakuntza da eta askok botatzen zuten faltan hamalau hilabete itxita egon ondoren. Estibaliz Aldeiturriaga kirol zinegotziak proiektua inork baino hobeto ezagutzen du eta pozik agertu da azkenean Hernanik baduelako behar zuen igerilekua.
«Aurreikusten dugu hasierako egunetan arazo batzuk sortuko direla, dena bere lekuan egon arte, gauza berriekin normalean gertatzen den bezala. Kontutan hartu behar da astean zehar 1.000 pertsona inguru dabiltzala ikastarotan soilik igerilekuetan. Oraindik ere falta dira gauzak. Erlojuak jarri behar dira eta markagailua ere bai. Bestetik energi iturri berria oso ongi dabil. Erabilerak berak erakutsiko dizkigu hobetu beharreko gauzak eta zer egin daitekeen. Erabiltzaileek esango dizkigute».
Bederatzi kaletan bihurtu daiteke eta lau beti egongo dira libre
Igerileku haundian jauzi lekuko koska kendu da eta tranpolinak luzatu dira. «Kontutan hartu behar da 65 urtetik gorako jendea gero eta gehiago dagoela eta igerilekuko edozein aldetik irteteko erraztasunak eman nahi izan ditugu» dio zinegotziak. Begirale, igeriketa eta waterpolo taldeen gomendioak ere jarraitu dira. «Kortxerak non jarri, banderinak ipintzea, markagailua, tranpolinak, porteriak...».
Zortzi kale edukitzeak aukera emango du gauza gehiago egiteko. Honela lau beti libre egongo dira igeri egin nahi duenarentzat. «Ikastaro eta erabiltzaile gehien dagoen orduetan bederatzi kale ere egin daitezke. Lau kale horietatik bat materialaren erabilpenerako izango da. Ahaleginduko gara pareta ondokoa izatea igeriketarako zailtasun gehiago dituen jendearentzat. Oreka bilatu nahi izan dugu libreki igeri egitera etortzen denaren eta ikastaroen artean. Ezin dena da berria ireki eta berriz ere txiki geratzea. Bederatzi kale daudenean bost egongo dira libre. Igerileku txikian ere banaketa orekatua egingo da».
«Ahalegin berezia egin da kirol jardueraren eta erabiltzaileen beharrak uztartzeko. Bilera asko egin dira eta igeriketa eta waterpoloa mantentzea nahi dugu»
Kontsumoa aurrezteko argitsua den igerilekua
Energia eta ur sistemetan egin diren aldaketen ondorioz, eraikin berriaren kalifikazio energetikoa A mailakoa da. Esti Aldeiturriagak gertutik jarraitu ditu lanak eta proiektua eta emaitzarekin gustora dago. «Pozik gaude. Guretzako klabeetako bat zen argitasunaren gaia. Ahalik eta kontsumo gutxien edukitzea helburua zen. Gas gehien kontsumitzen duen instalazioa da kiroldegia (%30). Hilabetean 25.000 sarrera izaten zituen kiroldegiak igerilekua itxi baino lehen. Sistema berriari esker, energia fosilen kontsumoa murriztu eta, ondorioz, ingurumenaren gaineko eragina txikiagoa izango da. Igerilekuko uraren berritzea egiterakoan uraren bero energia berreskuratzeko sistema ezarri da. Euskal Herriko bigarren kirol instalazioa da sistema hau jarri duena».
Energia sistema aldatzeaz gain, kiroldegiaren irisgarritasuna eta segurtasuna hobetu dira. «Kiroldegia egin zenean, orain 33 urte, irisgarritasun hirizpideak ez ziren kontutan hartzen. Orain hori dena hartu dugu kontutan. Latsunbe Berri auzoan egin den komunikazio nukleo berriak bost solairuen irisgarritasuna eta goiko bi planten segurtasuna (ebakuazioa) bermatzen dute».
Sotoko aldageletako solairutik spining eta pilates gelen solairura arteko bost oinak lotzen dituen igogailua egin da. Aldageletarako sarbidearen ondoan kokatuta dago eta bi erabilera bereizten dira. Bazkide edo instalazioen erabiltzaileenak: kiroldegiko tornuak igarota, bost solairuetara joateko aukera dute. Erabiltzaile ez direnak: kafetegi eta harmailen arteko solairutik (Elkano kaleko solairua) Latsunbeko sarrerarainoko igogailu lotura dute.
«Jendea gogotsu egon da irekitzeko eta erantzun du. Ikastaro gehienak bete dira»
Behar desberdinetara egokituta dago oreka bilatuz
«Garrantzitsua da jakitea nondik gatozen eta norantza goazen. Alde batetik behar duzu sakonera gutxi duen eremu bat herritarren ur jardueren (aqua gym, ur ekintzak, mantentze ikastaroak…) eskaera gora doala kontuan hartuta. Bestetik ahalegin berezi bat egin dugu kirol jarduerarekin orekatzeko. Waterpolo eta igeriketa taldeen jarduera bermatzeko beharrezkoak diren baldintzak betetzen ditu igerileku berriak. Klubak jarraitzea eta mantentzea nahi dugu». Bilera asko egin ondoren pozik geratu dira.
Taldeak izan ziren lehenak uretaratzen pasa den asteazkenean. «14 hilabete egon dira igerilekurik gabe eta merezi zuten beraiekin zerbait berezia egitea» dio kirol zinegotziak.
Kanpoko terraza-solariuma, zegoen tokia aprobetxatzeko egin da
Igerilekuaren beste berrikuntza kanpoan dagoen terraza-solariuma da eta Estibalizek argitu nahi du egitearen arrazoia. «Jendeak galdetu digu nolatan egin dugun hori Euskal Herrian. Gauza da azpian biomasa galdara dagoela eta gainean ezin da ezer eraiki. Beraz uzten genuen gune huts bat, ezer egin gabe, edo aprobetxatu terraza-solarium bat jartzeko. Eguraldi ona egiten badu ikastaroetakoek esaterako aprobetxatu dezakete zerbait egiteko».
«Eskaintza zabaltzea eta lan gehiago sortzea suposatzen du haunditzeak»
Latsunbe Berrikoa da sarrera nagusia
Obraren proiektuak, barruko egituran ez ezik, kanpoaldean ere eragina izan du. Eraikina hiri paisaiarekin duen artikulazioa hobetzea izan da helburua, kiroldegiak inguruko espazio publikoarekiko erreferentzialtasuna hartzeko. «Beheko sarrera da orain erreferentzia nagusia, printzipala». Proposamen honi esker, eraikinaren barruko zirkulazioa eta eraikinaren funtzionaltasuna hobetu da.
«Kiroldegia erdigunean egotearen abantaila aprobetxatu behar da»
Beñat Amenabarrrek, aurreko kirol zinegotziak, ereindako hazia goraipatu nahi du Aldeiturriagak. «Hausnarketa bat egin zen eta hor hasi zen behar bati gorputza ematen. Mahai potente bat sortu zen. Kiroldegiaren kokapena ezin hobea da eta gertutasunak dituen abantailak aprobetxatu behar zirela argi genuen. Igerilekuaren kokapena kiroldegian izateak suposatzen du jendeak gehiago hurbiltzea eta kirol edo jarduera fisiko gehiago egitea. Txikia geratu zen eta igerilekuak handiagoa izan behar zuela ez zegoen zalantzarik. Astigarragako erabiltzaileak ere etortzen dira eta lekua behar zen. Inbertsio bat da eta ez da gastua, bai osasunean eta bai herritarrengan. Jendea gogotsu egon da irekitzeko eta erantzun du. Ikastaroetako talde gehienak ia beteta dauzkagu. Hor ikusten da erabilera».
65 urtetik gorakoentzat eskaintza ikastaroak egiteko
Igerilekua haunditzeak suposatu du eskaintza ere gehitzea. «Jende nagusientzat eskaintza gutxi zegoen, ia batere ez, eta orain berriz edukiko dituzte ikastaroak. Haur askok erabiltzen dute igerilekua, baina jende nagusiak ere pila bat erabiltzen du. Osasunari begira onuragarria da. 65 urtetik gorakoentzat talde bat sortu da; igeri egiten ikasteko eta beste bat aqua gym egiteko. Alkatearen gutun bat iritsiko zaie gonbidatzera ikastaroetan parte hartzeko. Ikusita Ttapa Ttapak zer arrakasta duen badago tendentzi bat aktibitateak egitera adin muga horretan. Jende aktiboa da».
Beste eskaintza igeriketa egokituarena izango da. «Orain arte ez genuen eskaintza espezifikoa behar bereziak dituztenentzat eta bada garaia. Pausokarekin hitzarmen bat dugu igerileku txikia erabil dezaten terapia egiteko. Lehen Donostiara joan behar zuten».
Igerilekuan erabiltzaile mota asko daude eta oreka bilatu nahi izan da denak asetzeko. «Zaila da eta hasieran bakoitzak bere aldera tiratzen zuen, baina azkenean harro gaude lortu dugulako denen artean igerileku egoki bat egitea Hernanin».
Jolasak bultzatuko dira
Haurrekin ere uraren inguruko beste erabilera bat ematen hasiko dira. «Igeriketa hezitzailea eskainiko da, jolasen bitartez. Haurrak gero eta gutxiago dakite jolasten eta psikomotrizidade edo psikomotoridade arazoak hasi dira somatzen denborarekin. Uretan jolas asko egin daitezke, igeri ikasi dezakezu eta gainera urak berdintasuna areagotzen du».
Joan Ander Isuskiza taldeko entrenatzaileak dio azken ukitu «garrantzitsuak falta direla»
Jon Ander Isuskiza Hernani Kirol Elkarteko igeriketa saileko entrenatzailea gustora dago igerilekuaren irekierarekin. «Donostiara joan beharrik ez dagoelako» horrek suposatzen duenarekin. Gainera txapelketentzako igerileku egokia dela uste du. «Oraindik ez da Federakuntzan bilerarik egin, baina Gipuzkoako Txapelketaren bat edo Euskal Herriko Kluben Kopa antolatzea gustatuko litzaiguke». Horrek igeriketarekiko bultzada suposatuko luke Hernanin, inoiz ez baita maila horretako txapelketarik antolatu. Hala ere igerilekuak oraindik gauzak falta dituela azpimarratzen du. «Markagailua ez dago oraindik, segunderoa eta erlojua ere ez eta jendeak ordua momenturo galdetzen digu. Berehala behar dira. Ahalik eta azkarren. Baita waterpoloko porteriak ere. Neurri minimoak errespetatu dira, baina azken ukituak, garrantzitsuak direnak eman behar dira. Poieteetako zenbakiak ere jarri behar dira txapelketak laster hasiko bait dira».