Gora egiten ari da Astigarragako biztanleria azken urteotan, eta hori kontuan hartuta, Harrera Protokoloa diseinatu zuen Udalak herritarrekin batera 2016garren urtean, «jatorri aniztasuna eta elkarbizitza sustatzeko».
Protokolo hori martxan jarri dute, berriro ere -maiatzean egin zuten moduan- eta agiri horri jarraituta, urteko bigarren Ongietorri saioa egin zuten asteazkenean, azkeneko bost hilabeteetan herrian erroldatutako pertsonekin. Pintxopotea musikarekin alaitzen ere izan ziren ostegunean.
Eta horren bueltan osatu dute, hain zuzen, aurtengo Aniztasun Astea, gaur bukatuko dena. Asteazkenetik hainbat ekintza egin ondoren, gaur borobilduko dute festa Janari Anitza jardunaldiarekin. Eguerdiko 12:00etatik 14:00ak bitarte, hainbat herritako jakiak probatzeko aukera izango da Joseba Barandiaran plazan. Hori guztia musika eta dantzek girotuko dute.
«Egun 6.000 biztanle inguruk osatzen dugu Astigarraga, azken 30 urteetan bere biztanleria ia bikoiztu eta gero»
Harrera Plana, aurkeztuta
2016an osatutako Harrera Protokoloak zehazten duen bezala, Ongietorri saioa izan da Aniztasun Asteko ardatza. Asteazken arratsaldean egin zieten harrera azkeneko bost hilabeteetan Astigarragan erroldatu direnei. Ekitaldi xumea izan zen, eta bertan izan ziren udal ordezkariak, teknikariak, eta baita herriko hainbat eragile ere.
Ekitaldia aprobetxatu zuten, baita ere, Udalak argitaratu duen Harrera Gida aurkezteko. Zerbitzu eta eraikin publikoen aurkezpena egiteaz gain, herriaren aurkezpena ere egiten dute. Besteak beste diote: «egun 6.000 biztanle inguruk osatzen dugu Astigarraga, azken 30 urteetan bere biztanleria ia bikoiztu eta gero. Hemen bizi garenon %60a euskaldunak gara, eta beste %23ak euskera ulertzen du, beraz, esan genezake Astigarragan euskeraz bizi garela».
Solasaldia, bertan behera
Ongietorri saioaren ondoren, solasaldia zegoen antolatuta ostegunerako; bertan bilduko ziren Astigarragara garai ezberdinetan bizitzera joan direnak, etorkizunerako erronkak zehazteko, batez ere, harreraren gaiari dagokionean.
Baina azken momentuan erabaki zuten atzeratzea. Aurrerago egingo dutela adierazi zuten, data zehaztu gabe.