Gipuzkoako Foru Aldundiaren egoitza nagusian izan ziren, asteazken eguerdian, Luis Intxauspe Hernaniko alkatea, Ana Carrere Andoaingoa eta Xabier Arregi Usurbilgoa. Eta bertan erregistratu zuten eskaera, bertan behera uzteko Buruntzaldeako autobus zerbitzuaren inguruko aurreproiektua: «eskualdeko autobus zerbitzuan murrizketa garrantzitsuak ekarriko ditu Aldundiaren aurreproiektuak, eta aurkeztu du inplikatuta gauden Udalei eta herritarrei jakinarazi gabe. Buruntzaldean 70.000 biztanle inguru gaude, eta ez du kontuan hartu ez Udalen, ez herritarren iritzia. Iturri ez ofizialetatik izan dugu horren berri», adierazi dute.
Carrerek bilera eskatu zuen Marisol Garmendia foru diputatuarekin eta asteartean bildu ziren: «jakinarazi zidan, ez daukatela parte hartze prozesurik abiatzeko asmorik, eta aukera bakarra alegazio epea luzatzea zela, larunbat honetan bukatzen baita».
«Egokitzapen horiek ezin dira bulegoetan erabaki»
Hiru alkateek adierazi dute, hori ez dela konponbidea, beste modu batera landu behar zelako aurreproiektua: «milaka herritarrei eragingo dieten aldaketak ezin dira onartu beraien behar eta eskaerak kontutan hartu gabe. Guk ez dugu esan nahi ez dela egokitzapenik egin behar, baina horiek ezin dira bulegoetan erabaki, erabiltzaileekin adostu behar dira».
Carrerek adierazi zuen, zerbitzu publiko baten kasuan, errentagarritasuna ezin dela izan irizpide nagusia; «kontutan hartu behar da murrizketek zein eragin duten kualitatiboki. Adibidez, emakumeak dira autobusa gehien erabiltzen dutenak, eta murrizketek, beraiek kaltetuko lituzkete gehien», ohartarazi zuen.