Buruntzaldeako «iragan bortitzari buruz», eskualdean gertatutako indarkeriari buruz alegia, ikus-entzunezkoak sortuko dituzte hainbat gaztek.
Helburu horrekin jarri du martxan Oroimena Bizigune programa, Gipuzkoako Foru Aldundiak. Atzo eman zuten egitasmoaren berri, Biterin, Maribel Vaquero Bizikidetza eta Giza Eskubideetako foru zuzendariak, eta Maren Iturburu Úbiqako ordezkariak.
Aurkezpena gaur, Biterin
Buruntzaldeako gazteei zuzenduta dago programa, 18 eta 25 urte bitartekoei, eta gaur aurkeztuko diete interesa duten guztiei. Biterin izango da hori ere, arratsaldeko 19:00etan.
Gazteak izango dira protagonista: «gazteak dira etorkizuna, eta beraiei dagokie biharko gizartean ere elkarbizitzan bizitzen jarraitzea», adierazi zuen Vaquerok. Eta Iturburuk gehitu zuen: «gazteak oso egokiak dira proiektu honetarako, ez dutelako iragan bortitz horrekin lotura zuzenik izan, eta beraz, gai direlako azterketa kritiko bat egiteko. Oso esperientzia aberasgarria da, asko ikasten dute».
Hiru fase, tailerrak
Oroimena Bizigune tailerrak hiru fase izango ditu. Aurrena, hausnarketa tailer bat egingo dute, indarkeriari buruz solasean aritzeko, mota guztietako herritarrak. Ondoren, ikus-entzunezkoen lanketari buruzko oinarri batzuk emango dizkiete, eta gidoi bat osatuko dute, elkarrizketak egiteko. Eta gero aterako dira kalera, herritarrei elkarrizketak egitera: «50 inguru izango dira, eta www.oroimenabizigune.org web orrian jarriko ditugu».Bukaeran, bideo bat ere osatuko dute, prozesu guztia bilduko duena. Hasierako tailerrak, egingo dira urriaren 20 (16:00-20:00) eta 21ean (10:00-14:00 eta 16:00-20:00), Biterin bertan.