Azpeitian jokatu zen aurreko larunbatean Euskal Herriko Sagardo Txapelketa Herrikoiaren hirugarren edizioa, eta Irigoien-Herrero sagardotegi astigartarrak lortu zuen hirugarren postua. Aurretik geratu ziren, Andoaingo Gaztañaga sagardotegia, garaile izan zena; eta Adunako Aburuza, bigarren postuan.
Hamabi finalista, Azpeitiara
Irailaren 8an eman zitzaion hasiera Euskal Herriko Sagardo Txapelketa Herrikoiari, Ordizian. Bertan izan zen aurreneko finalaurrekoa; ondoren, beste hiru ere izan ziren: Andoainen, Zarautzen eta Oiartzunen. Denera, 41 sagardotegik hartu zuten parte finalaurrekoetan, eta bertatik pasa ziren finalera. Aurreneko biak zuzenean pasa ziren; besteak, ordea, puntuazioz.
Horrela, bada, iritsi ziren azkeneko hamabi sagardotegiak aurreko asteko Azpeitiako finalera, tartean izan ziren lau astigartar: Irigoien-Herrero bera, Lizeaga, Oiarbide eta Rezola.
Astigarragako lau sagardotegi izan ziren Azpeitiako finalean.
Herritarrak, epaile
Duela hiru urte Gipuzkoako Sagardogileen Elkarteak berreskuratutako tradizioa da Txapelketa herrikoia. Helburua da «[herritarrak beraiek] epaile izatea, afaltzera eseri eta sagardoak dastatzea, lagunarteko giroan». Gainera, «aukera ematen du herritar askoren iritzia jakiteko».