Igerileku berriaren inaugurazioaren bueltan, bere ikuspegia azaleratu nahi izan du Hernaniko PSE-EEk, prentsa ohar baten bitartez; eta salatu du, «EH Bilduren mespretxua eta taktu falta» oposizoarekiko. Izan ere, kexatu da ez zuelako «gonbidapenik jaso», aurreko ostegunean Foru Aldundiarekin batera egin zuten inaugurazio instituzionalera joateko.
«Asteartean, Hirigintza Batzordean, galdetu genuen noiz izango zen inaugurazioa, eta alkateak erantzun zigun aste horretan egingo zela, ostegun edo ostiralean. Handik ordubetera, kirol zinegotziak jakinarazi zuen, ostegunean arratsaldeko 15:00etan izango zela ekitaldia, instalazio berriak ikusteko. Beraz, EH Bilduk ordurako ezagun zuen plana, oposizioari ez ikusia egin nahian. PSE-EEri behintzat, ez zaio inolako gonbidapenik iritsi», adierazi du Ricardo Crespok, alderdiaren bozeramaileak.
«Oposizioak enbarazu egiten diela dirudi, bakarrik azaldu nahi dute argazkian»
Crespok azaldu du, EH Bilduren jarrera horrek «aldi berean haserretu eta tristetu» egin dituela: «badirudi oposizioaren presentziak enbarazi egiten diola Gobernu Taldeari. Beraiek bakarrik azaldu nahi dute argazkian, Hernaniren mesedetan beraiek bakarrik lan egingo balute bezala».
Modu berean, gogorarazi nahi izan du, beti azaldu direla kritiko obra horrekin, beste toki batean jarri behar zelako igerilekua, eta hainbat hobekuntza proposatu zituztela: «uste dugu horietako batzuk kontutan hartu zitzaketela, Latsunbe kalean aparkalekuak mantentzea edota igerileku txikian zoru bigunagoa jartzea adibidez», azaldu du.
Crespok kritikatu du, bestalde, ez zietela jakinarazi asteazkenean igerilekuak bisitatuko zituztela igeriketa taldeekin: «honek gogorarazten digu, gimnasioko erabiltzaileen batzordearen hasiera, non Gobernu Taldeari enbarazu egiten zion oposizioa egoteak; edota beste kirol klubekin bileretan egotea eskatu dugunean, eta erantzun digutenean federatuak izanda ez zutela egoki ikusten. Ez dugu ulertzen zein beldur dioten, oposizioa egoteari parte hartu nahi duen foroetan».