Txapelarik ekarri ezinda bueltatu dira pelotari hernaniarrak, asteburuan. Bi final zeuzkaten jokoan, denboraldi berriko hirugarrena eta laugarrena, baina biak galdu zituzten.
Partidu gogorra jokatu zuen Paul Ojuelek, Albizturreko Telletxearekin batera, Santxo eta Arangurenen kontra, Aginagako finalean. Erritmo bizi-bizia izan zuen lehiak, eta berdinduta joan ziren, baina gehiago izan ziren usurbildarrak azkenean (16-22).
Ioritz Arrietak, berriz, Murgiondo azpeitiarrarekin jokatu zuen Aizarnazabalgo finala, Labaka eta Olaizolaren kontra. Baina hasieran berdinduta joan ziren arren, ez zuten aukerarik izan gero (11-22).
Hobeto joan ziren gauzak Gipuzkoako Txapelketan. Zazpi partidutik lau irabazi zituzten pelotari hernaniarrek. Garrantzitsua izan zen, Aizmendi eta Insausti jubenilek lortutakoa; hirutik hiru irabazi dituzte.
Ojuel eta Lizeaga seniorrek galdu zuten aurrenekoz, baina semifinaletara sailkatzeko moduan dira oraindik.