Ez zeukaten lan erraza atzo, Emakumezkoen Euskal Ligari hasiera emateko, hernaniarrek. La Unica talde nafarra izan zuten aurrean Landaren, iazko indartsuena; eta aurten ere oso indartsu dagoela erakutsi zuen estreinakoan. Hernaniarrak baino gehiago izan ziren zelaian, eta garaipena eraman zuten Iruñara (0-103).
Gaurkoan, berriz, mutilen txanda izango da. Ohorezko Mailako hirugarren partidua jokatuko dute; aurrenekoa, Landaretik urrun. Izan ere, Bartzelonara joango dira, La Teixonera zelaira, eguerdiko 12:00etan Bartzelonaren kontra jokatzeko.
Printzipioz behintzat, kontrario zuzena da talde kataluniarra, trikoloreentzat. Aurreko urteotan, biak ibili dira mailari eusteko borrokan, eta baita biek lortu ere.
Hortaz, aurreko bi partiduetan kontrario indartsuak izan ondoren, azterketa ona dute gaurkoa, irabaztetik datorren talde baten kontra: La Vila igo berriari nagusitu zitzaion Bartzelona, etxean (36-11).