Gaur hasiko dute bidea, Euskal Herriko Bertsolari Txapelketa Nagusian barrena, Unai Agirre hernaniarrak eta Agin Laburu astigarragarrak. Biek, Gipuzkoako txapelketan lortu zuten Euskal Herrikoan parte hartzeko txartela.
Leitzan kantatuko dute gaur arratsaldeko 17:00etan, Iñaki Apalategi, Julio Soto, Oihana Bartra eta Oihana Iguaranekin.
Iraulio Panttalone bertso eskolako Laburu eta Agirre bertsolariek, hasierako fasea gainditzea dute lehen helburu. Ez da, baina, erronka erraza. Izan ere, final laurdenetan parte hartuko duten 36 bertsolarietatik erdiak, hau da, 18, kanpoan geldituko dira. Urriaren 14ra bitartean jokatuko diren 6 laguneko 6 final laurdenetako irabazleak pasako dira finalaurrekoetara zuzenean, eta puntu gehien pilatzen dituzten beste 12ak; guztira, 18 bertsolari.
Gainera, lehenengo postua garesti dago finalaurreko honetan, Txapelketa Nagusiko finalista berrien kiniela gehienetan ageri diren bertsolarietako batzuek kantatzen dutelako, gaurko kanporaketa honetan.
Horrenbestez, saioak ikus-mina sortu du, bai Asti-garragan eta bai Hernanin. Esan bezala, hitzordua gaur arratsaldeko 17:00etan Leitzan izango da, eta Udal kiroldegiko atea 16:00etan irekiko dute.