Berrikuntza garrantzitsu batekin hasiko du 2017-2018 ikasturtea Kutxa Ekoguneak: «abeletxea plus bat izango da hezkuntza eskaintzan, erreminta bat gehiago, eta gainera, Ekogunearen instalazioak errefortzatuko ditu. Izan ere, aurretik oiloekin egin izan dira jarduerak, baina honekin animaliak eta ekintzak gehituko dira», azaldu du Jon Ander Galarraga hezkuntza programaren arduradunak.
Eskolari jarraipena ematea, helburu
Aurreko ikasturteetan bezalaxe, astean zehar hezkuntza komunitateari zuzenduko dira, batez ere: «hasieran eskolei eta, batez ere, txikienei zuzendu ginen, eta orain, espektroa zabaldu nahi dugu Lanbide Heziketarako, Unibertsitaterako, Bigarren Hezkuntzarako... eskaintza eginez».
Publiko honi bideratuta, katalogo bat dauka Ekoguneak, eskaintzen dituzten tailerren inguruan: «eta horietatik aukeratu dezake eskolak berak. Helburua da eskolan lantzen ari diren gaiei nolabaiteko jarraipena ematea», dio Galarragak berak.
Hain zuzen, hainbat gairen bueltan sortu dute eskaintza, adin tarte bakoitzerako: baratza ekologikoa, ura, energia, hizkuntza-ekologia...
Baina betiere, helburua da eskolaren lanari jarraipena ematea: «gure eskaintza ez da parentesi bat eskolarekin, kate bat baizik, gidoi bat».
Eta lan horretan, ondo ari direla frogatzen ari dira: «iaz Euskal Herri osoko 10.500 ikasle igaro ziren Kutxa Ekogunetik», aipatu du Ekoguneako ordezkariak.
Familiei eskaintza zabalagoa, asteburutan
Asteburuetan, aldiz, familia osoak ditu helburu Kutxa Ekoguneak. Azkeneko urteotan bezalaxe, Haur Parkea irekitzen dute. Eta aurten, eskaintza zabaltzea da asmoa: «Ekogunean zehar eta abeletxean bisita gidatuak eginda indartuko da familientzako eskaintza», jakinarazi du Hezkuntza programaren arduradunak.
Kontzientziaziotik ekintzetara, Ekoguneako instalazioetan
Azken finean, eskaintza osoaren helburua berbera da: «kontzientziaziotik ekintzetara pasatzea. Eta hori ahalbidetu nahi du Ekoguneak, ikusi, ukitu eta sentituz, gauza fisikoen bidez kontzientziatzera, gero egunerokoan aplikatu ahal izateko», borobildu du Jon Ander Galarrak.