Denboraldi berezia izango da aurtengoa, gaur hasiko dena, Hernaniko emakumezkoen taldearentzat. Berezia, esperientzia haundiko zenbait jokalarik utzi dutelako taldea, beste jokalari berri asko sartu direlako, eta inoiz baino jokalari gehiagorekin ari direlako lanean; berezia, hasiera zaila izango den arren, etorkizunera ilusioz begiratzeko arrazoiak aurkitu dituztelako.
«Aldaketa urtea izango da taldean», azaldu dio Amets Castrejana entrenatzaileak, Kronikari: «urteak zeramazkiten jokalariak joan zaizkigu, bereziki hiru laurdenetan. Baina aldi berean, jende berri dexente daukagu, jokalari asko iritsi dira taldera».
«Oso positiboa da jende berria sartzea, baina pazientzia izan behar dugu; ikasketa prozesu bat dakar»
Taldearentzat albiste onena da hori, jokalari berriak gehiago izan direla, utzi dutenak baino: «25 jokalarirekin ari gara entrenamenduetan, eta oso pozik gaude. Gozada bat da jende gehiagorekin entrenatzea», dio Castrejanak.
Baina noski, talde berria eta gaztea izateak, denbora eskatzen du: «oso positiboa da jende berria sartzea, baina pazientzia izan behar dugu, ikasketa prozesu bat dakarrelako. Hori da aurtengo erronka. Esperientzia haundiko hernaniarrak dauzkagu, eta beraien eskutik osatu eta formatu nahi dugu taldea, pixkanaka egonkortu».
Onartzen du Castrejanak, «pixka bat zoramena» izango dela hasieran, hainbeste jokalari berrirekin, «kudeatzeko zailagoa». Horregatik, garbi dauka «pixkanaka» joan beharra daukatela, «ikusiz nola erantzuten duten jokalariek. Bi hilabete barru, sendoago egongo gara».
Abuztuaren bukaeratik ari dira lanean, astean hirutan entrenatzean; baina batzuek ostiraletan bakarrik daukate joateko aukera, kanpoan ikasten ari direlako.
Promozioko multzoan sartzeko aukera?
Talde sendo bat osatuz joatea izango da helburu nagusia, beraz. Baina lehiaketa ahaztu gabe, noski. Gaur hasiko dute Euskal Liga, Iruñako La Unica taldearen kontra, eguerdiko 17:30etan Landaren.
«Gogo haundiarekin aterako gara, baina errespetuz ere bai. Kontrario gogorra da La Unica, iaz talde indartsuena izan zen», dio entrenatzaileak. Eta berdintsu helduko begiratzen diote ligari ere, gogoz baina errespetuz: «aurreneko fasean, hamar talde arituko gara, eta lau onenek, promozio fasea jokatuko dute gero. Fase horretan sartu nahiko genuke, baina oraindik ez dakigu borroka horretan egotea posible ote den. Ez dugu presiorik izan behar, pixkanaka joan behar dugu, talde sendo bat osatzeko. Iaz, jendez larriago ibili ginen, baina esperientzia gehiagorekin. Bukaeran lortu genuen gure maila onena, eta horregatik, denboraldiko emaitza ez zen hain ona izan».
«Joku alaia, azkarra eta dinamikoa egin nahi dugu»
Eta hain justu, iaz lortu zuten joku horri eman nahi diote jarraipena, jokalari berriekin ere: «ni aurrelaria nintzen jokalari bezala, teknikoa, eta gustatzen zait joku alaia, azkarra eta dinamikoa egitea, baina ahaztu gabe indarra ere badaukagula. Hori da Hernaniren estiloa, klub bezala, eta estilo hori ezarri nahi dut taldean; iaz lortu genuen, eta jarraipena eman nahi diogu aurten», dio Castrejanak.
Hori lortzeko, jokalari guztiek izango dute jokatzeko aukera, denboraldian zehar: «partidu zailak izango ditugu, baina baita hain zailak ez direnak ere. Eta bigarren horiek, egokiak dira jende berria probatzeko, jokalari guztiei aukera emateko».
Jokalari kopuruari dagokionez, talde orekatua daukate, postuz postu; «baina esperientzia gehiago daukate aurrelariek, hiru laurdenetan jende berri asko daukagu». Zonalde hori indartzeko lan egin beharko dute, beraz.
«Jokalari asko edukita, errazagoa da proiektuari jarraipena ematea»
Baina orainari begira bakarrik ez, etorkizunera begirako lana ere izango da hori: «jokalari asko dauzkazunean, errazagoa da proiektuari jarraipena ematea. Kantitateak aukera gehiago ematen dizkizu, baina konstantea izan behar duzu lanean», ohartarazi du.
Ilusioa pizteko arrazoiak ikusten ditu Amets Castrejanak, taldearen garai berri honetan: «lortzen badugu bloke honek jarraipena izatea, etorkizunera begiratu dezakegu. Aurtengoa ikusita, hala izan daitekeela dirudi. Eta horrela bada, zergatik ez Liga Nazionalera igoera lortu, hemendik bi edo hiru urtera?».