Hitza izango da datorren astelehenetik ostiralerako antolatu den Hernani Hitzetan ekimenaren gakoa. Hitzaren bitartez erakutsiko dira hizkuntzak eta aurkeztuko dira jatorri desberdinetako pertsonak. Era berean izango da han eta hemengoen integraziorako aitzaki.
Bide horretan hasi ziren lanean 2015ean Udal liburutegia eta AMHER-SOS Arrazakeria elkartea. Eta elkarlan sendo horren islada da Hernani Hitzetan ekimena. Hain zuzen, hirugarren edizioa aurkeztu zuten ostegunean, eta bertan izan ziren Damian Pedrosa, Kooperazioko zinegotzia, Rakel Gonzalez, liburutegiko arduraduna eta bere lankideak, baita AMHERreko hainbat kide ere.
Tartean zegoen, baita ere, Alekos kontalari kolonbiarra, Hernani Hitzetaneko aurreneko ekintzako arduraduna. Berak eskainiko du gaur, hirugarrenez, Ahozko narrazio tailerra. Goizeko 10:00etatik aurrera izango da, Biterin.
Etzitik, herriko txoko guztietan
Astelehenean hasi eta ostiralera arte, egunero egingo dituzte kontaketak, eta horretarako, herriko sei txoko erabiliko dituzte: Biteri, Gaztetxea, Goiz Eguzki, Leoka, Ave Maria eta Parke Botanikoa. Gainera, afari bereziak egingo dituzte Gaztetxean. Eta horrez gain, narrazioa eta kulturartekotasunari buruzko bi tailer izango dira Lanbide Heziketako institutuko ikasleentzat.
Egitaraua
- GAUR, 10:00-14:00: Ahozko narrazio tailerra.
- ETZI, 20:00: Ipuinak: ongietorria darbuka eta txalapartarekin.
- Urriaren 3an. 09:30: Ipuinak eta musika, Biterin; 18:00: Ipuinak eta musika, Goiz Eguzkiko parkean.
- Urriaren 4an. 10:00-14:00: Kulturarteko tailerra, Lanbide Heziketan; 19:00: Poesia irakurketa: jatorri ezberdineko emakumeak, Leokan; 21:00: afari ukraniarra, Gaztetxean; 22:00: Ilargia hitzetan: gaur-emanaldia mikro irekia.
- Urriaren 5ean. 11:15: Ipuinak, Institutuan; 19:00: 15 minutuko ekitaldiak jarraian, Ave Marian; 21:00: Munduko zaporeak pintxotan, Gaztetxean; 22:00: Ilargia hitzetan: gau-emanaldia mikro irekia.
- Urriaren 6an. 11:00: Ipuinak, Gizakia Helburun; 18:00: Poesia, musika eta ipuinak, Parke Botanikoan; 20:30: Afari marokoarra, Gaztetxean; 22:00: Ilargia hitzetan: gau-emanaldia mikro irekia.
*Gaztetxeko afarietako txartelak salgai, Udal Liburutegian eta Amherren