Emaitza onak lortu zituzten aurreko asteburuan, pilotari goizuetarrek. Zortzi partidu jokatu, eta bost irabazi zituzten. Buruz buru, Aitor Aizkorbek 18-4 irabazi zion Zabaletari; Antton Apezetxeak 18-3 Errozi; eta Egoitz Elizegik 18-1 Iribarreni. Iker Salaberriak, berriz, bikoteka jokatutako biak irabazi zituen, partidu garrantzitsuak gainera: batetik, Corteseko txapelketako finala irabazi zuen, Mariezkurrena IIrekin, Garcia eta Aldaveren kontra (22-20); eta bestetik, Aizarnazabalgo txapelketako finalera sailkatu zen, Mariezkurrenarekin horretan ere, Exposito eta Zezeagari irabazita (22-6). Atzo arratsaldean ziren finala jokatzekoak.
Galdu egin zuten Axel Salaberriak, Olarraren kontra (9-18); Oihan Legarretak, Igoaren kontra (7-18); eta Adur Sagarduik, Iribarrenen kontra (3-18).
Gaur, bost partidu
Beste hainbat zita dauzkate asteburu honetan, goizuetarrek, eta bost partidu jokatuko dituzte gaur. Goizeko 10:00etan hasita, Iruñako Labriten ariko dira jubenilak: Aizkorbe, Gamboaren kontra; eta Apezetxea, Ardoiren kontra. Goizuetan, berriz, 11:00etan hasiko dira partiduak: Apezetxea benjamina, Iturralderen kontra; eta Legarreta alebina, Sagastibeltzaren kontra. Eta azkenik, 16:00etan Zubirin ariko da Sagardui; Santesteban aurkari.