Hasi da denboraldi berria, Hernani saskibaloi taldearentzat ere. Aurreko asteburuan ekin zioten seniorrek, Gipuzkoako 2garren mailari, eta nola gainera! Azkune iazko txapeldunari irabazi zioten, etxean (50-40).
Hasiera ona, anbizio haundiko helburua markatu baitu taldeak, denboraldi berrirako: «igoera lortzen saiatu nahi dugu, aurreneko bi sailkatuen artean egon, edo play offean borrokatu», azaldu du Urko Vitoriak, saskibaloi taldeko koordinatzaileak.
Aldaketa asko izan dituzte aurten, ikasketak, lana edo lesioak tarteko, baja ugari pilatu dituztelako. Guztira, bost jokalari dira berriak, ia talde erdia, baina «konstantzia» da beraien indargunea: «beti borrokan dagoen taldea da, inor ezinbestekoa izan gabe eta guztiek parte hartuz». Altuera falta orekatzen dute, oso joku fisikoa eta alaia eginez, eta asko presionatuz, betiko sistema berdinarekin: «kiroldegira datorren taldeak, jakin behar du beti berdin jokatuko dugula, aurreneko edo azkeneko sailkatua izan».
Nesken talderik ezin osatu
Mutilen beste hiru talde izango ditu Hernanik, azpiko kategorietan. Juniorrek errendimenduko kategorian jokatuko dute aurten, baina aurreneko urtekoak izanda, mailari eustea izango da helburua. Kadeteak, berriz, bigarren urtekoak dira dagoeneko, eta edozein kontrariori aurre egiteko gai izan nahi dute. Eta bigarren urtekoak dira infantilak ere, baina mini talderik ez dutenez, beste klub batzuek abantaila daukate; helburua, erdi parean egotea.
Zailago daude gauzak nesketan. Iaz bi talde izan baziren, «inoiz baino gehiago», aurten ez dute talderik osatzea lortu: «oso zaila da, beste kirol batzuetara jotzen dutelako». Eta horren arazoa, kirolaren ezagutza faltan ikusten du Vitoriak, «beste kirol batzuetan hobeto landu dezakete eskola»; eta baita eskura dauzkaten instalazioen eskasian ere: «afizioa sortzen da, kirola ezagutzeko eta praktikatzeko aukera daukazunean». Izan ere, garbi dauka kalitatea eskaini dezaketela entrenamenduetan, «heziketa prozesuari eta errespetuari garrantzia emanez».