DENBORALDIKO lehen porrota jasan zuen Mundarrok, Erregional Preferente mailan, pasa den asteburuan Santo Tomas Lizeoaren aurka 1 eta 3. Etxeko lehen partidua zuten astigartarrek, Hernanin lehen partidua irabazi eta gero, garaipena lortzeko itxaropenarekin. Hala ere, aurkariak hasieratik nagusitasuna erakutsi zuen, ideiak argiago izanez eta partiduaren erritmoa kontrolatuz.
Lehen zatiaren bigarren erdialdean aurreratu zen Lizeoa eta emaitza horrekin iritsi zen atsedenera. Bigarren zatiaren hasieran etxekoak berdinketaren bila irten ziren presioa eta jokuaren intentsitatea igoz. Horren aurrean kanpotarrek partiduaren erritmoa jeitsi zuten baloia gehio kontrolatuz eta hauetako batean hutsunea ikusi eta 0 eta 2koa gauzatzea lortu zuten. Gola jasotzeaz gain, minutu gutxira moreak hamar jokalarirekin geratu ziren Manuk txartel hori bikoitza ikusi ondoren.
Partidua amaitzeko 15 minutu falta zirela etxekoek 1-2koa lortu zuten, baina berehala kanpotarrek hirugarrena lortu zuten, partiduan sartzeko aukera eta itxaropen guztiak kenduz. Hamaikakoa: Garin, Joxe Mari, Nogales, Arzallus (Gorka), Manu, Grande, Mateos (Aitor), Joseba (Guti), Igor, Andoni (Gartzi), Txomin (Mendi).