Sagar Uztak hamazazpigarren edizioa bete du aurten sagardotegietako dolaretako lanen hasiera ospatzeko eta sagardoaren kulturan oinarrituriko jarduera ugari izan ziren igandean Astigarragan.
Sagarra protagonista izan zen Astigarragan: sagarren erakusketa eta dastaketa, sagardo eta muztio dastaketa, saski eta txertaketa erakustaldiak eta 2017 uztako lehen muztioaren elaborazioa egon ziren. Astigarragako hainbat familiek dolarean bertan muztioaren usadiozko elaborazio prozesuan parte hartu zuten sagarra bildu, jo eta zanpatuz. Behin elaborazio lanak bukatuta, lehen muztioarekin topa herrikoia egin zen txalapartaren erritmora.
Harrera bikaina izan zuten jardunaldian XVII. Sagar Uzta 2017 ospatzeko antolaturiko jarduerek, besteak beste: familientzako sagar muztioaren elaborazio lanek (60 parte-hartzaile), sagardo dastaketak (13 sagardogile), X. Sagar Uzta argazki rallyak (16 parte-hartzaile) eta sagar postre lehiaketak (7 parte-hartzaile), Pepa Caballero suertatu zelarik irabazle.
Ipintzak irabazi zuen Sagardobide erronka
Aurreko egunetan ospatu ziren jarduerek ere partehartze handia izan zuten herrian zehar: sagarren eratorriekin egindako pintxo-poteak, Sagar motak ezagutuz Santiagomendiko Sagardo Bidean zeharko mendi-bueltak, familientzako sagarrekin egindako apainketa tailerrak (30 parte-hartzaile), Garbibai Zafari meriendak (40 parte-hartzaile) eta IV. Sagardobide Erronkak, non lehia gogorraren ostean, Ipintza sagardotegia izan zen erronka irabazi duena 1:58:05 denborarekin.