Ez-ohiko Plenoarekin hasi du ikasturte politiko berria Astigarragako Udalak. Asteazkenean egin zuten, eta udal korporazio osoko ordezkarien parte-hartzearekin sei gai jorratu zituzten, azkenekoa informazio, galdera eta eskariei dagokiona.
EH Bildu: «Bere garaiean esan genuena berretsi egiten du akordio honek»
Udara aurretik egindako azkeneko Plenoaren akta onartzeari ekin zioten lehenengo. Aldeko hamabi boto izan zituen, izan ere, Ione Olaziregi EH Bilduko zinegotzia abstenitu egin zen, ez zelako egon.
Hurrengo puntuan joko gehiago eman zuen, dudarik gabe. Martxoaren 29ko Plenoaren erabakia bertan behera uztearen inguruko akordioa bozkatu zuten orduan.
Hasteko, oposizioko bi alderdiek, EH Bilduk eta PSE-EEk bozketa puntuz puntukoa izatea eskatu zuten. «Bigarren puntua modu bat da eztabaida politikoa eta oposizioaren lana oztopatzeko», adierazi zuen Andoni Gartziak, EH Bilduko bozeramaileak. PSE-EEko Mikel Duranek, aldiz, juridikoki jarri zuen zalatzan puntu hori: «egunotan ez dut ez udaletxerik, ez Parlamenturik ezagutzen hori egiten duenik».
Jon Arregi EAJko zinegotziak onartu zuen «puntu honen ispiritua ez da mozioen proposamena etetea, baizik eta ez egitea kalzadorearekin».
Aurreneko puntuak, aldiz, «gerakina ez erabiltzeko konpromisoa» bertan behera uztea proposatzen zuen, eta horren inguruan EH Bilduk argi esan zuen akats bat izan zela erabaki hori: «bere garaiean esan genuena berretsi egiten du akordio honek».
Hori horrela, aurreneko puntua aho batez onartu zuen; eta Alkatearen eskakizunez, bigarren puntua bertan behera uztea bozkatu zuten.
Zazpi aldeko, hurrengoetan
EAJ eta PSE-EEren aldeko botoekin onartu zituzten hirugarren, laugarren eta bosgarren puntuak. Aurrenekoan, kredituaren aldaketari dagokionean, EH Bilduk aurkako botoa eman zuen beraiek aurkeztutako alegazioei kasurik ez dietelako egin: «adostasun nahiko haundia daukagu, hainbat puntutan izan ezik». Aipatu zituzten Mapa Morea, Haur Eskola, DBH eta DBHren hiritartze prozesua, Herri Eskolaren haundipena, Irisgarritasun Plana, Ergobiako aisialdi gunea edota Santiomendiko Kaxkoa.
Zorione Etxezarraga alkateak esan zuen «begirune osoz» hartzen dituztela EH Bilduk egindako proposamenak, baina uste duela «aurrekontuen eztabaidan sartu daitezkeela».
‘Zarkumendegiren Zabalpena’ bozkatu zuten, ondoren, eta EAJ eta PSE-EEren aldeko botoekin eta EH Bilduren abstentzioarekin. «Posizioan aldaketarik ez» zutela adierazi zuten EH Bilduko kideek.
Haur Eskola, baita ere
Haur Eskolaren gaia izan zen, beste behin, Plenoko gaietako bat. PSE-EEko Duranek Alkateari eskatu zion «bere konpromezua berresteko» eta hala egin zuen Etxezarragak. Halaber, hamabost eguneko epea eskatu zuen Udal gobernuaren proposamenak eskatzeko.
Udala - Prentsa Oharra
Kultur Etxe berria martxan jartzeko, pausu garrantzitsua
Asteazkeneko Plenoan onartu zuten eraikin berriaren eraikitzea ahalbidetuko duen hitzarmena, EAJ eta PSE-EEren aldeko botoekin.
Bosgarren puntua izan zen asteazkenean, etorkizun hurbilarekin lotura zuzenena izan zuena. Orduan onartu baitzen behin betiko Astigarragako POHAko ‘Ergobia Ibilbidea’ - HEA 9.1ko Hirigintza-hitzarmenaren aldaketa, eta horrek ahalbidetuko du Kultur Etxe berria eraikitzen hastea, Udal gobernuak prentsa-ohar bitartez jakinarazi duen bezala. «Akordioaren behin betiko onarpena ezinbesteko erabakia da Astigarragaren etorkizunerako. Izan ere, Kultur Etxea eraikitzea ahalbidetzeaz aparte, Urumea Berri auzoan beste hainbat proiektuen eraikitzea jarriko du martxan: 50 hektareetako ur parke bat eta etorkizuneko aldiriko trenaren geltokia herriarekin lotuko duen pasarela», azaldu dute.
EAJ eta PSE-EEren aldeko botoekin
Behin alegazioak aurkezteko epealdia bukatu denean onartu dute behin betikoz hirigintzako hitzarmena. Hain zuzen, Udal gobernua osatzen duten EAJko 6 zinegotziek, eta PSE-EEren bakarrak eman zuen aldeko botoa. EH Bilduko seiek, aldiz, kontra bozkatu zuten, «nahiz eta Astigarragarentzat garrantzia berezia duen akordioa izan», adierazi dute prentsa-oharrean.
«Ezinbesteko erabakia da Astigarragaren etorkizunerako»
Aldaketa, hasierako proposamena hobetzeko
Udal gobernutik azaldu bezala, «legegintzaldi honetako aurreneko bi egunetan Udal gobaren eta promotoraren arteko negoziaketen ondorioz, hitzarmenaren aldaketa nabarmenak egin dira, hasierako aldaketa guztiz hobetzen dutenak, tartean, Kultur Etxe berriaren azpiko 1.400 m2ko azpisotoa».