Arkitektura eta natura uztartuko ditu 2018ko udal egutegiak, ArkitekNatura izenburupean. Aurten ere «herritarren argazkiekin» osatuko dute egutegia, eta horiek bidaltzeko epea ireki dute dagoeneko. Urriaren 21era arte izango da argazkiak bidaltzeko aukera.
Hainbat baldintza
Herritarrekin osatutako egutegia izango da, eta beraz, herritar orok izango du parte-hartzeko aukera. Dena den, hainbat baldintza ezarri dituzte horretarako: argazkietan arkitektura eta naturarekin, biekin, lotutako elementuek azaldu behar dute; izenburu bat izan behar dute; pertsonako gehienez 5 argazki aurkeztu ahal izango dira; eta Hernaniko argazkiak izatea derrigorrezkoa da, baita ere.
Oinarriak xehetasun osoz irakurtzeko, jo Udalaren web orrira: www.hernani.eus.
Aurtengo berrikuntza: saria, 13 irabazleentzat
Urriaren 28an iragarriko dira 13 irabazleak zeintzuk diren, hilabeteko argazki bat eta azalekoa, hain zuzen.
Aurten, gainera, nobedade bat izango da horientzat guztientzat: irabazle bakoitzak 40 euroko balea jasoko du, Berriak merkatarien elkarteko saltokietan gastatzeko. Horrela beraz, denera 520 euro banatuko ditu Udalak, irabazle guztien artean.