Larunbatean hasi zuen Mundarrok liga, Erregional Preferenteen mailan; eta modurik onenean hasi zuen, gainera: Hernani bizilagunaren zelaian irabazi zuen (1-2), Zubipen.
Partidua, hala ere, ez zuten bide onetik hasi moreek. Zelaian bere tokia hartu ezinik aritu ziren aurreneko minutuetan, eta aurreneko gola sartzeko aprobetxatu zuen Hernanik, 10garren minutuan. Gainera, kolpe gogor bat hartu zuen Ivanek, eta Gartzik ordezkatu zuen.
Baina momentu txarrari buelta eman zion taldeak, eta minutu gutxira berdindu zuen Igorrek, jokaldi polit baten ondoren, ondo gurutzatutako jaurtiketa batekin. Hortik aurrera, lehia orekatua izan zen, baina atsedenaren aurretik, aldeko penaltia izan zuen Hernanik... eta bikain gelditu zuen Garik! Horrela, banakoarekin iritsi ziren atsedenaldira.
Kontraeraso eder batekin, garaipenaren gola
Aldageletatik ondo bueltatu ziren astigartarrak, eta laster aprobetxatu zuten: kontraeraso ederra egin zuten Garinek eta Gutik, eta Igorrek aprobetxatu, bigarrena egiteko.
Hortik aurrera, estutu egin zuen Hernanik, baina bikain eutsi zioten, ordena mantenduz eta lana gogotik eginez. Garaipena, Astigarragara.