euskal Jaiak bigarren eguna zuen atzo Hernanin, garai bateko bizimodua ekarri, ezagutarazi eta goraipatzen duen festa, hain zuzen. Helburu horrekin hamaika ekintza egin zituzten, eta gaur sagarraren eta sagardoaren eguna izango da, batez ere, Plazan eta Tilosetan, Plaza Berriko artisau azoka ahaztu gabe.
Txistularien diana, hasteko
Goizeko 09:00etan hasiko da gaurko eguna herriko goiztiarrentzat. Orduan egingo du irteera txistularien bandak, Kaxkoan zehar diana joaz.
Lehen aldiz Pablo Lasa Artisau Azoka abendutik Euskal Jaira pasa dute. Ondoren, Plaza izango da festako erdigunea, bertan egingo baitute, 11:00etatik aurrera, sagardo dastatzea herriko hainbat sagardotegien laguntzarekin.
Pelota partiduak, trikitixa txapelketa eta Sagartu ikuskizuna, bukatzeko
Euskal identitatearekin oso lotuta dauden bi ekintza izango dira protagonistak, goiza bukatzeko.
12:00etatik aurrera, pelota partiduak izango dira Tilosetan, bai eskuz baita palaz ere. Eta azkenik, 12:00etan hasita, XXgarren Trikitixa Txapelketa jokatuko da Plazan.
Txapelketako parte-hartzaile bakoitzak hiru pieza joko ditu. Dena den, parte-hartzaile guztiek etxeratuko dute saria.
Eta lehen aldiz Euskal Jaia arratsaldean amaituko da. 19:30etan hasiko baita Sagartu antzeslana Oinkari dantza taldea eta Hika Teatroarekin.