herrian zehar dauden hamaika gazte mugimendu desberdinek, Koordinadora zabal eta irekia osatu berri dute, «eragile bakoitzaren autonomia osoa errespetatu eta elkar elikatzen duena». Horren falta sumatu dute azken urteetan.
Bilera guztiak irekiak dira, eta kudeaketaren ardura txandakatuz joango da. «Edonork parte hartzeko aukera dauka, eta beraz, gazte mugimenduko eragile eta gazte orori gonbidapena luzatzen diegu, guztion jardunak koordinatu eta bide berean borroka egin dezagun».
Koordinadora honen helburu nagusia da, gazte problematika eragiten duen sistema kapitalista-patriarkala iraultzea, beraien esanetan; eta horretarako, «gazte izateagatik jasaten dugun gazte problematikaren ikuspegi orokorra barnebiltzea, problematika hori alor desberdinetan lantzen duten eragileak elkartuz», azaldu dute.
Lanaren aurreneko emaitza, Gazte Eguna antolatzea
Hilabete hauetako lanaren ostean, urriaren 14an Gazte Eguna ospatuko dute Hernanin, Sagarrari koxk! lelopean. Badira urte dezente, azken aldiz gazte eguna antolatu zela herrian, eta uste dute «badela garaia Gazte Mugimenduaren espresio ezberdinak kalean batu eta etsaiari hilda ez gaudela erakusteko; hau da, behingoz sagarrari koxk! egiteko. Festaz gain, eguna aldarrikapenez eta edukiz beteko dugu, eta beraz, gonbidapena luzatzen dizuegu Hernaniar guztiei, parte hartu dezazuen», dei egin dute.
Oraingoz, Hernaniko Gazte Mugimenduaren Koordinadoraren parte dira: Kanika aisialdi taldea, Hernaniko Langileon Babes Sarea, Sutu, Ernai, Urrunegi, Denak Ala Inor Ez, Kontrakantxa gaztetxea, Kritikherri, Gazte bizilagunak, Hitzarrik euskara taldea, eta Ikasle Abertzaleak. yy