Udarari bukaera emanen diote aste hauetan Goizuetako Iskibi kanpineko kideek, eta horretarako ekintza pare bat antolatu dituzte. Aurreko larunbatean 3garren Iskibifesta egin zuten, garagardo festa eta kontzertuekin. Eta bihar, ohitura duten bezala, Euskal Jaiak ospatuko dituzte.
Hamargarren edizioa, biharkoa
Aurten, hamargarrenez antolatu du festa hau Iskibi kanpinak. Eguerdiko 12:30etan hasiko da kanpina girotzen, herri kirolekin. Bertan, Goizuetako gazteek beraien arteko desafioa eginen dute. Ondoren, 14:00ak aldera izanen da otordu nagusia: talo-jatea eginen dute, Goizuetako talogileen eskutik. Eta horrekin batera eskainiko dira: sagardoa, ardoa, kafea eta kopa. Horretarako txartelak salgai daude Amaia kafetegian eta kanpinean bertan.
Bukatzeko, arratsaldeko 17:00etan izanen da toka txapelketa. Trikitilariek girotuko dute kanpina, egun osoan zehar.