Maila berria ezagutzen, «tenperatura hartzen» ari dira Hernaniko jubenilak, Ohorezko Mailan; Estatuko kategoria gorenean: «oso desberdina da, oso maila altua dago, eta guztiontzat da berria, entrenatzaile eta jokalarientzat», dio Jordi Telletxea entrenatzaileak. Bat dator horrekin Jagoba Erdozia kapitaina: «dena bi segundu lehenago gertatzen da, eta ez dago inor txarra. Taldeek ez daukate hutsunerik, nondik min egin».
Baina edonola ere, baikor dira biak, zelaian izandako sentsazioekin: «ikusi dugu lehiakor izan gaitezkeela. Ez gara deseroso ibili, baina gure mailatik eta jokatzeko estilotik urruti gaude oraindik. Marjina daukagu hobetzeko».
Aurrerapauso bat emateko asmoz aterako dira Zubipeko zelaira gaur, 18:00etan, Realaren kontra: «ilusioz eta konpetitzeko gogoz zelairatuko gara, irabaztera; ez gara inor baino gutxiago. Ikustera etortzen denak, ikusi behar du gure nortasuna, dena ematen duela taldeak; harro sentitu behar du», diote.
«Taldea osatu, ilusioa piztu, gure estiloa berreskuratu eta disfrutatzea da helburua»
Maila honetan, talde xumea da Hernani: «erdi profesionala da kategoria hau, talde onenak daude, jokalari onenekin; lehenengo mailan jokatzera iritsiko diren horiek, hain justu. Orain arteko bi partiduak lehiatu ditugu, baina akatsak garesti ordaintzen dira».
«Dena bi segundu lehenago gertatzen da maila honetan. Ez dago inor txarra, eta taldeek ez daukate hutsunerik. Hemen daude lehenengo mailara iritsiko direnak»
Hori horrela, oso garbi daukate bidea zein den, Hernaniko entrenatzaile eta jokalariek: «errazena litzateke, kirol helburu bezala jartzea mailari eustea, baina hori oso pobrea da. Gure helburua da taldea osatu, ilusioa eta grina piztu, gure estiloa berreskuratu eta, batez ere, disfrutatzea. Eta hori guztia lortzen badugu, agian mailari eusteko moduan izango gara. Baina hori, helburua baino, ondorio bat izan behar da», diote.
«Azkeneko urteko Hernani izatea lortu behar dugu berriro, eta zenbat eta gertuago egon, aukera gehiago izango ditugu emaitza onak lortzeko». Ezustean Liga Nazionaletik igotzea lortu zuen Hernani; aurreko urtean Liga Nazionalera iritsi zen Hernani: «guretzako ere sorpresa izan da, egia esan. Klabea da, urtero lortu dugula taldea osatu, estiloa garatu eta ilusioa piztea, jokalarien erdia aldatuta ere».
Hala gertatu da aurten ere: taldeko jokalari asko igo dira seniorretara, eta talde erdia gelditu da. Horien ordez, ohorezko jubeniletatik igo dira lau-bost jokalari, kadeteetatik beste bi, hiru fitxatu dituzte, eta beste hiru Realak utzita iritsi dira; horietako bat hernaniarra, aurretik klubean aritutakoa: «oso jarrera onarekin etorri dira denak».
«Ohorezko erregionalean jokatzeko prest ateratzen dira asko, jubeniletatik»
Jubeniletan gertatzen ari den fenomeno horrek, badauka eragina, aurreneko taldean ere: «azken urteotan, jubeniletatik ateratzen diren asko, dagoeneko aurreneko urtean prest daude ohorezko erregionalen taldean jokatzeko. Eta hori, harrobiaren meritua ere bada. Aurten, aurreko urteko jubeniletatik, bostek egin dute aurredenboraldia ohorezko erregionalekin, eta hiru-lau geldituko dira taldean, denboraldirako ere», dio Telletxeak.
«Maila honetan egoteak ez digu burua galduarazten, badakigu gure oinarria harrobia dela»
Azpiko taldeetan ere, maila badagoela diote: «baina kontziente izan behar dute, pausoa haundia dela, eta gehiago eman behar dela. Maila honetan egoteak ez digu burua galduarazten, badakigu gure oinarria harrobia dela. Behin gertatu daiteke kasualitatez, baina orain tendentzia bat dago: jubenilen bi igoerak, erregionalen bigarren postua... Gauzak ondo egiten ari garen seinale da hori».