MUGIKORTASUN astea gaur hasiko da Hernanin eta asteburua modu osasuntsuan eta dibertigarrian hasteko plan ezin hobea antolatu da Patin Festarekin. Aurreneko ekintza da Patin Festa. Egitaraua 10:30etan hasiko da eta oparien zozketarekin amaituko da 13:30ak aldera.
Pasa den urtean CD Hernaniko irristaketa sailak antolatu zuen lehen aldiz eta aurten egitarau zabalagoa prestatu dute. «erakutsi nahi dugu, patinatzea ez dela jolasa bakarrik, kirol osasuntsu bat ere badela», diote, CD Hernaniko irristaketa saileko arduradunek.
Patinetan ibilaldia egiteko aukera izango dute, trebatuta daudenek; eta hain trebeak ez direnek eta hasiberriek, jolasak izango dituzte Latsunbeberriko pistan. Gero, modalitate ezberdinetako patin erakustaldiak izango dira bertan, bertako patinatzaileekin.
Goiz guztian zehar Latsunbeberriko pistan ekitaldi desberdinak egingo dira. Ume eta hasiberrientzako ibilbide erraza egingo da, patin abentura, helduentzako ibilbideak zailtasun handiagoa du.
Txikien ibilbidea ondorengoa da: Latsunbeberriko pista, Atarrabiyo, Sorgintxulo, Atarrabiyo eta Latsunbeberri.
Helduenen itzulia hau izango da: Latsunbeberri, Latsunbe, Perkaiztegi, Atletismo pista, Sagastialdeberri, Etxeberri, Sagastialdeberri, Montebideo, Karmelo Labaka, Latsunbe eta Latsunbeberriko pistan bukatu. Hamaiketakoa partaideentzat, freestyle erakustaldia eta oparien zozketa ere egongo da. Euria egiten badu, kiroldegian.
Ipar Martxa berrikuntza nagusiena, bihar
Aurtengo berrikuntza nagusia Ipar Martxarena izango da. Oinarrizko ikastaro bat emango da, atletismo pistatik abiatuta eta Ave Maria parkera joanez. Gero bueltatuko dira.
Goizeko 10:00etan hasi eta eguerdian amaituko da. Euria egiten badu ekintza hau ere kiroldegira pasako litzateke. Makilak utziko dira.