Iritsi da, azkenean, JuleneFest ospatzeko astea. Ostiral arratsaldean hasi, eta larunbat iluntzera arte, makina bat ekintza izango dira, Astigarraga eta inguruko herritarrek antolatuta; guztia, Julene laguntzeko.
Hala ere, azken xehetasunak lotu eta informazio pixka bat zabaltzeko bilera irekia deitu dute gaur antolatzaileek, 20:30etan kultur etxean. Era berean, kamixetak eta pultserak saltzen ariko dira gaur, 16:30etan, Herri Eskolako patioan.
«Askok ez zekiten nola lagundu»
Amaiur Altamira Olaziregi eta Leire Zubiarrain San Miguel, unibertsitateko lan baten bueltan jarri ziren harremanetan Julene Beldarrain Murillo astigartar gaztearekin eta haren ama, Manolirekin. «Juleneri hau gertatu zitzaionean, herria txikia denez, denak enteratu ginen. Baina Julene ikusita, askok ez zekiten zer zeukan, eta nola lagundu».
Eta horrelaxe sortu zen JuleneFest antolatzeko ideia. «Manoli konturatu izan da askok ez zekitela nola eduki harremanak Julenerekin, eta honek, horretarako balio du. 17 urteko beste edozein gazte bezalakoa da. Ez dauka arazo kognitiborik. Komunikatzeko eta mugimendu arazoak dauzka».
Bi talde eta beste hainbat laguntzaile
Ideia garatzeko, ordea, laguntzaileak behar izaten dira, eta Astigarragan ez dira falta. «Manolik bazekien jendeak gogoa zeukala zerbait egiteko, askotan esan baitiote zerbait egin behar zela. Baina ez zuen inork martxan jartzen».
Hasi diren arte. «Aurreneko bilera egitean konturatu ginen jendeak gogoa zeukala. Ideia pila bat sortu ziren, eta denak, oso onak. Denak ez ziren aproposak festa honetarako, baina hau txupinazo moduko bat izan daiteke, aurrerago etor daitezkeenetarako. Hobea da orain gutxixeago egin eta jendea gogoz geratzea, gerorago beste gauza batzuk antolatzeko».
«Etengabe eskerrak ematen»
Laguntzeko prest azaldu direnen artean daude, adibidez, ostiraleko sardina jatea antolatu duen guraso taldea, patata tortillak egingo dituzten herritarrak, sagardoa jarriko duten sagardogileak, kontzertuak emango dituzten musikariak... Baita ere, larunbateko bazkaria antolatzen ari den koadrila. «Hasieran produktuak erostea pentsatu genuen, baina diru gutxiago bilduko genuen horrela. Talde honi esker, debalde jarriko dituzte Euska Label eta Alberrok».
Horrez gain, Juleneren koadrilakoek haurrentzako futbola antolatu dute, eta musika eskolako lagunek kontzertuak.
«Egun hauetan Julene eta familia seguru urduri daudela. Baina bereziki, eskertuta. Etengabe eskerrak ematen dituzte». Izan ere, bildutako dirua, egunero behar izaten dituen tratamenduak ordaintzen laguntzeko izango da. Horregatik, mundu guztia dago festara gonbidatuta. «Uste dugu ez dela inor geratuko festara hurbildu gabe, tartetxo batean bada ere. Julene bera ere hemen ibiliko da, DJari laguntzen, musika asko gustatzen zaio eta!».