KONTXAN parte hartzen ari diren traineruak astebete izan dute bigarren jardunaldia ongi prestatzeko eta horien artean dago Maialen, Hernaniko nesken ontzia. Bere helburua pasa den asteko azken postua hobetzea izango da eta posible bada, sailkapen orokorrean, talderen bat gainditzea are eta hobeto. Hernaniarrak lehen txandan aterako dira, 11:00etan, eta aurkari izango dituzte Donostiarra, Deusto eta Mecos.
Pasa den igandean ez ziren ongi bueltatu Xabier Zabala entrenatzailearen esanetan eta horrek azken postura eraman zituen. Donostiarra zortzi segundora dute eta Deusto hamabira. Mecos urrutiago agertzen da 16 segundora.
Lehen txandan eta banderaren bila ariko da Amaia Zuaznabar hernaniarra Orioko traineruan. Oriotarrak Hibaikarengandik 10 segundora daude eta San Juanengandik zortzira. Arraun Lagunakek osatzen du ohorezko txanda.
Mutiletan Arkaitz Goñi, Ivan Lopez eta Aitor Iraolak lehen txandan egingo dute arraun. Lehena San Juanen eta beste biak Donostiarran, azken postua urruntzen saiatuko dira. Hernaniar jatorria eta Zabaloenea baserriko semea den Imanol Iradi ere Donostiarran irtengo da.
Denak ere itsasoari eta eguraldiari begira
Lehenenengo jardunaldiak denbora itzelak egin zituzten, baina bigarren jardunaldian giro desberdina espero da. Ipar-mendebaldeko haizea espero da eta bi metro inguruko olatuak altxatuko ditu. Beraz, patroien lana eta olatuen artean arrauna egiteko desafioa areagotu egingo da eta aldeak ere haundiagoak izan daitezke.