Kurtso berrian euskera ikasi edota indartu nahi duenak, dagoeneko zabalik dauka matrikulazio epea, Hernaniko Udal Euskaltegian eta AEK euskaltegian. Bietan, autoikaskuntza eta aurrez aurreko saioak daude aukeran, maila guztietan (A1, A2, B1, B2, C1, C2).
Udal Euskaltegian, astean bi edo lau egunez joateko aukera dago. Irailaren 22ra arte dago epea, apuntatzeko, euskaltegian bertan (Karobieta 63): goizez 09:30-13:30, eta arratsaldez 16:30-19:30. Bestela, 943 33 18 96 telefonora deituta edo euskaltegia@hernani.eus helbidera idatzita egin daiteke.
AEK euskaltegian, berriz, astean bi, hiru edo lau egunez eman daitezke klaseak, goizean, eguerdian, arratsaldean edo iluntzean. Gainera, Zilegi Eskolako ikastaro bereziak eta Mintzalagun egitasmoa ere egingo dituzte aurten, berriro. AEKko ikastaroetan apuntatzeko, lokalera (Larramendi 11) jo daiteke, astelehen, asteazken eta ostiraletan goizez (09:00-13:00), eta astearte eta ostegunetan arratsaldez (17:00-19:00); 607 592 864 telefonora ere deitu daiteke; edo hernani@aek.eus helbidera idatzi.
Udalaren dirulaguntzak, euskera ikasteko
Bi euskaltegiek gogorarazi dute, euskera ikasteko dirulaguntzak ematen dituela Hernaniko Udalak: matrikularen %90 langabetu, ikasle, jubilatu eta pentsiodunei, eta %70 gainerakoei.