Urtero bezala, Sagardo Eguna egin zuten Donostian joan den larunbatean, Euskal Jaien bueltan, eta bertan izan ziren 34 bat sagardogile, tartean hainbat astigartar.
Baina tarte hori bakarrik ez, protagonismo haundiagoa izan zuen aurten Astigarragak. Izan ere, omenaldi xumea jaso zuen bertan Bereziartua sagardotegiko Joxe Miguel Bereziartuak, «sagardogintzari eskainitako bizitza eta lanagatik».
Eguerdi aldera izan zen ekitaldia, eta oholtza gainera igo zen Bereziartua bera, Eva Aranburu emaztearekin batera. Eta esku preziatuengandik jaso zuten Gipuzkoako Sagardogileen Elkarteak eskainitako oroigarria: beren semeen eskutik, hain zuzen.
Omenalditxoa bukatzeko, Aitor Mendiluze eta Oihana Iguaran bertsolariek eskaini zizkietan bertsoak.
8.000 botila, 5.000 lagun
Aurreko urteko uztako sagardoak edan eta aurtengo aurreneko muztioa dastatzeko aukera izaten da urteko Sagardo Egunean, eta hala izan da aurten ere, 32garren edizioan. Gipuzkoako Sagardogileen Elkarteak eskainitako datuen arabera, 8.000 bat botila ireki zituzten sagardogileek aurreko larunbatean, eta Konstituzio plazan bueltaka ibili ziren, 5.000 bat lagun.
Uzta oparoa, aurtengoa
Sagardogileak hasi dira dagoeneko sagarrak biltzen, eta azaldu dutenez, «uzta oso oparoa» izan da aurtengoa.