Indiar kutsuko jardunaldi berezia antolatu dute Hernanin, irailaren 15ean. Arratsaldeko 19:30etan hasita Santa Barbara elkartean, HIESari irabazitako bizitzak dokumentala jarriko dute aurrena, eta indiar afaria eskainiko dute gero, 21:00etan.
Calcuta Ondoan GKEak antolatu du, Hernaniko Kooperazio Taldearen eta Udalaren laguntzarekin. Izan ere, Udalaren dirulaguntza batekin garatu du proiektua GKEak, Indian HIESa duten pertsonekin lanean. Horregatik, gaiaren bueltan, sentsibilizazio ekimen bat ere antolatu dute Hernanin.
India munduan herrialde kaltetuenetakoa, HIESarekin
Fernando Verak zuzendu du dokumentala, eta Indiako HIESaren gaixoen testigantzak jasotzen ditu. India da, hain justu, munduan hiru herrialde kaltetuenetako bat: 2,1 milioi indiarrek zeukaten HIESa, 2013 urtean; mundu osoan 36,9 milioi ziren, 2014an.
Proiekzioaren ondoren, mahai ingurua egingo dute bertan, Irantzu Jauregi Hernaniko berdintasun teknikariarekin, eta Asier Lekuona Gipuzkoako HIESaren Aurkako Erakundeko gizarte hezitzailearekin.
Afarirako, izenematea
Eta 21:00ak aldera hasiko dute afaria, «Indiako zapore goxoa izango duena», aurreratu dutenez. Menua ere jakinarazi dute: hasteko, patata kroketak, menta chutneya, berenjena purea, pepino eta yogurt krema, eta opil bejetalak; ondoren, tandoori oilaskoa, garbantzu masala, eta basmati arroza; eta bukatzeko, mango eta melokotoi laasia. Indiar ogia eta edaria ere izango dira.
Bertan afaldu nahi duenak, hori bai, aurrez eman behar du izena, ostiral honetara arte: 943 43 18 49 eta 943 33 70 17 telefonoetan, edo comunicacion@ calcutaondoan.org eta lankidetza@hernani.eus emailetan. 18 euro dira.