Ikasturtea hasteko garaia iritsi den honetan, irekita dago hainbat ikastarotan izena emateko epea.
Biterin aurrematrikula, ostiralera arte
Biterin helduentzako 22 ikastaro jarri dira aukeran; beste 6 umeentzat; eta ikasturte osorako izena eman ezin dutenentzat, 4 ikastaro labur. Denetan izena emateko epea gaurtik ostiralera egongo da irekita, eta behar den kasuetan, plazak zozketatuko dira hilaren 11n. Ondoren, matrikula epea irekiko da.
Kantuzen, gitarra klaseak
Ikasturte berri honetan Kantuz musika eskolan (Aristizabal 5) gitarra klaseak jasotzen jarraitu nahi dutenek, berriz, gaurtik hilaren 15era arteko epea daukate izena emateko, eta ikasle berriek, hilaren 18tik 22rakoa. Udaleko Harrera Zerbitzura jo behar da, edo Hezkuntza Sailera deitu: 943 33 70 41.
Haurrentzako tailerrak, doan
Auzo elkarteek, urtero bezala, 5 eta 11 urte bitarteko umeentzako tailerrak emango dituzte debalde, eta hauetan parte hartzeko izenematea ere gaur irekiko da, hilaren 15era arte. Tailerrak urrian hasiko dira.
Kirol taldeak martxan, baina izenemateak irekita
Bestalde, hainbat kirol talde hasi dira entrenamenduekin. Gimnasia erritmikoa eta gimnasia akrobatikoa egiten dutenen kasuan, lehiaketa mailan aritzen direnek, gaur hasiko dituzte entrenamenduak, eta gainontzekoek urrian. Ikasle berriek, berriz, alebin mailatik gorakoen kasuan, gaur dute izena emateko azken eguna, eta benjamin eta benjaminaurre mailetakoak, irailaren 15era arte: 688 688 444 edo hernanigimnastika@gmail.com.
Ikasturteari hasiera gaur emango dioten beste batzuk judo klubeko kadete mailatik gorakoak dira. Txikiagoak, hilaren 18an hasiko dira. Aurreneko aldiz probatu nahi dutenek, berriz, izena eman dezakete, 6 urtetik gora izanez gero: judohernani@gmail.com edo 658 881 112.
Atletak gaur, entrenatzera
Azkenik, atletismo klubeko atletek, 2004 eta 2005ean jaiotakoek, gaur dute aurreneko entrenamendua, 18:00etan atletismo pistan.