Zergatik ez? Horixe zuen buruan aurten hernaniar batek baino gehiagok. Izan ere, ordezkari bikaina izan dute Galarretako frontoian, Buruz Buruko Kutxabank Txapelketan: Endika Barrenetxea.
Lehengo urtean finalera iritsi, eta Urrizaren kontra neurtu zituen indarrak; 30 eta 21 galdu zuen orduko hura, eta aurten, bere estiloari jarraituz, «pauso bat aurrerago» eman nahi zuen Barrenetxea IVak; txapelaren bila ari zen. Ezinezkoa izan da, ordea, atzo Uterga nabarmen gailendu baitzitzaion, finalerako pasea lortzeko borrokan.
Deseroso, partidu osoan zehar
Partidu orekatua espero zen; hernaniarrak sakeetan min egitea zuen aukera, eta Utergak, peloteora jotzea. Baina paperak aldatu zituzten.
Barrenetxea deseroso aritu zen partidu osoan, eta akatsak egin zituen sakean eta errestoan. Nahiz eta hasieran partiduari eutsi peloteoari esker, Uterga izan zen nagusi sakeetan. Bazirudien eutsiko ziola nolabait Barrenetxeak, 14-7 eta 14-10 gerturatzean. Baina 21 eta 12kora pasata, ezinezkoa izan zen. 30 eta 15 galdu zuen.