Azkartasuna irabazi du aurten Hernaniko ‘Maialen’ ontziak; halaxe erakutsi du Ligan. Hala ere, hori nahikoa ez izatea kezka zuten hernaniarrek.
Baina ondo baino hobeto egin zituzten lanak osteguneko sailkapen proban, eta seigarren eginda, Kontxarako sailkatutako zazpi ontzietako bat izatea lortu zuten. Maila horri eutsita, lan ederra egin dezakete.
Hernani, bigarren txandan
Estropadak goizeko 11:00etan hasiko dira, eta aurreneko txandan, Hibaika, Mecos, Orio eta Donostiarra ariko dira lehian. Horien artean ere izango da hernaniarrik; Amaia Zuaznabar, Oriorekin.
‘Maialen’ ontzia, berriz, bigarren txandan ariko da, San Juan, Arraun Lagunak eta Deustoren kontra. Orain arteko hobekuntza ikusita, baliteke Hernanik iazko markak hobetzea; ostegunean Deustoren aurretik geratzea lortu zuen, iaz atzetik geratu bazen ere. Lehia bizia izango da, seguru.
Mutiletan, etxeko beste hiru
Eguerdiko 12:00etan ekingo diote lehiari, mutilek, eta hor ere ez da hernaniarrik faltako. Aurreneko txandan, Kaiku, Orio, San Juan eta Zierbana ariko dira, eta bigarrenean, Urdaibai, Hondarribia, Tiran eta Donostiarra. Azken horretan ariko dira Aitor Iraola eta Ivan López, eta San Juanekin, Arkaitz Goñi. Imanol Muñoz, berriz, kanpoan geratu zen ostegunean, segundo bakarrarengatik, San Pedrorekin.