Hernani bigarren urtez jarraian Kontxako Banderan ariko da bihartik aurrera. Xabier Zabalak entrenatzen dituen neskak seigarren amaitu zuten sailkapen estropada borobil bat egin eta gero. Ondorengo zozketan bigarren txandan aritzea suertatu zitzaion. Maialenekin batera, txanda berean, ariko dira arraunean San Juan, Arraun Lagunak eta Deusto. Estropadak 11:00etan hasiko dira.
Hernaniko mutilak azkenengo aldiz Kontxan 1978an izan ziren eta pasa den urtean bueltatu ziren berriz estropada garrantzitsuenera, baina nesken mailan. Iazko maila hobetzea da helburua.
Amaia Zuaznabar hernaniarra Orioko traineruan dago eta Kontxan egingo du arraun.
Arkaitz Goñiren hamabigarren Kontxa
Neskak ez dira izango Hernaniko arraunlari bakarrak. Nahiz eta mutilen txaluparik ez izan, egongo dira hiru hernaniar arraunean beste bi taldetan. Pasai Donibaneko tostetan Arkaitz Goñi dabil. Aurtengoa bere hamabigarren Kontxako Bandera izango da. Ez da inoiz hernaniarrik egon hainbeste Kontxako ediziotan arraun egin duenik. Eta Donostiarra taldean beste bi hernaniar daude; Ivan López eta Aitor Iraola. Denboraldi bikaina egin dute donostiarrek eta Kontxarekin eta TKE Ligarako igoera fasean borobildu nahi dute.