Udara aurretik beste hainbat emanaldi egin zituen Goiz Eguzki abesbatzak, 10garren urteurrena ospatzeko, eta ikasturte berriari ere, ospakizun giroan eman nahi izan dio hasiera.
Horrela, gaur musika eta antzerkia nahastuko dituen emanaldi berezia izango da: Musika&Antzerkia.
Eszenatoki bat edo beste, eguraldiaren arabera
Hasiera batean, emanaldia Goiz Eguzki egoitzaren kanpoaldean egitekoak dira, Ginkgo Biloba zuhaitz bereziaren ondoan, arratsaldeko 19:30etan hasita (etxeetan banatu den agendan ordua gaizki dagoela jakinarazi dute). Behar adina aulki jarriko dituzte, eta soinu ekipoa ere izango da, guztia ondo entzun ahal izateko.
Eguraldi txarra egiten badu, ez da emanaldia bertan behera geratuko; egoitza barruan egingo da. Beraz, modu batera edo bestera, gaurkoan aukera izango da Javier Zubimendik zuzendutako ahotsak entzun eta Karmen Mendiolak gidatutako aktoreak ikusteko.
Egoitzako taberna kudeatzeko eskaerak aurkezteko epea, irailaren 18ra artekoa da.
Aldaketa, taberna kudeatzeko eskaerak aurkezteko epean
Ikasturte hasiera honetan, abesbatza ez da egoitzan martxan jarri den bakarra. Ofizina ere ireki da, eta baita taberna ere.
Hain zuzen, taberna, jatetxea eta atezaindegia ustiatzeko eskubidea esleitzeko lehiaketa publikoa jarri du martxan Udalak, eta jakinarazi du proposamenak aurkezteko epea irailaren 18ra luzatu dela. Aurkeztu beharrekoak Zerbitzu Sozialen erregistroan entregatu behar dira, astelehenetik ostiralera, 09:00etatik 14:00etara.
Proposamenak irekitzeko ekitaldi publikoa, era berean, irailaren 20ra atzeratu da.