Gaur eguerdian hasi eta igande arratsaldera arte, Fête de la BD, Europako komikigintzaren topagune garrantzitsuenetakoa dena egingo da Bruselan. Komiki Jaialdi honetan izango da Ainara Azpiazu Axpi hernaniarra, Iñaki Martiarena Mattin komikilariarekin batean.
Euskal Herrian egindako lanek, tokia
Bi komiliariak Etxepare Euskal Institutuak gonbidatu ditu. Izan ere, Etxeparek parte hartzen du EUNIC sarean; Europako kultura institutu nazionalen sarean, eta Euskadiko Europar Batasuneko Ordezkaritzarekin lankidetzan, Euskal Herrian euskeraz eta gaztelaniaz egiten diren lanak erakusteko, Euskadi-Basque Country/Etxepare Basque Institute izeneko stand edo postua jarriko du, EUNIC sareko beste kide batzuekin batean (Estonia, Errumania, Hungaria, Portugal eta Polonia).
Tailerra, umeentzat
Bai Axpik eta baita Mattinek ere, aukera izango dute egiten duten lanaren berri emateko, eta sektoreko editore, profesional, argitaletxe eta publikoarekin harremanak egiteko.
Postuan egon bitartean, gerturatzen direnentzako marrazkiak egingo dituzte, eta mahai-inguruetan ere hartuko dute parte.
Era berean, tailer bana emango dute. Axpik, bihar bertan: haurrentzako tailerra zuzenduko du, marrazketaren oinarrizko kontzeptuen inguruan. Mattinek, bestalde, igandean sorkuntza tailerra emango du, umeentzat baita ere.
Jaialdia barruan eta kanpoan
Axpi Nazioarteko Pabilioian jartzen diren postuetan izango da. Baina horrez gain, beste hainbat gunetan ere izaten dira erakusketa, tailer eta mahai inguruak. Era berean, azken egunean, kaleetan barrena ibiltzen dira komikietako protagonistak.