Amaitu da nesken Gipuzkoako Traineru liga eta azken estropada Hernaniko Maialen txalupak seigarren amaitu zuen lehen DYA Banderan. Estropada Pasaiako ahoan jokatu zen eta Hibaika etxeko Pasai Donibane traineruari gailendu zitzaion hamar segundoko aldearekin. Hirugarren sailkatu zen Orio, sanjuandarren segundo berean, laugarren Arraun Lagunak, bosgarren Deusto eta seigarren Hernani, garailearengandik 40 segundora. Atzetik utzi zituen Donostiarra, Portugalete eta Lea Artibai.
Bosgarren amaitu du Liga
Ligako emaitza guztiak batuta hernaniar neskak bosgarren sailkatu dira. Denboraldi hasieran laugarren posturako borrokan ibili ziren, baina estropadak aurrera joan ahala postu bat galdu dute. Hala ere emaitza eta balorazioa onak dira.
Atzoko estropadan traineru asko osteguneko Kontxarako sailkapen estropadari begira egon ziren.
Ostegunean, 17:30etan erlojupeko proba egin beharko du Hernanik eta aurten sailkatzea oraindik ere garestiago dago.
Hamairu traineruk eman dute izena eta horietatik lau galiziarrak dira eta bat kantabriarra.