Garrantzitsua izan ohi da San Roke eguna Arano eta Astigarragako ermitetan, eta aurten ere, musika eta dantzaren laguntzaz ospatu zuten asteazkenean.
Aranoarrak txistuarekin; astigartarrak, dantzan
Urtero bezala, Aranon hasi zen festa aurrena; goizean goizetik arratsaldera arte zipriztindu zuten herria txistuen doinuekin. Aurten, 16 txistularik egin dute bat bertan: Hernanitik, Patxi Apezetxea, Garbiñe Tijero, Boni Agirresarobe, Jesus Mari Gutierrez, Joseba San Sebastian eta Karlos Prado; Elorriotik, Iñaki Azkoaga; Aresotik, Modesto Lasa; Lekeitiotik, Markos Zapirain, Jabi Zabala, Koldo Sebastian eta Joseba de Izagirre; Iruñeatik Gabriel Ugartemendikoa eta Joseba Tobes, Getariatik, Alejandro Egurbide; eta Leitzatik, Juanmi Salazar.
Astigarragako Santiomendiko ermita, ordea, jendez bete egin zen, bereziki, meza nagusiaren ostean, orduan egin baitzuten ohiko dantza emanaldia Astigar dantza taldeko kideek.