Osiñagako Auzo Elkarteak antolatuta, udarari amaiera ezin hobea emango diote auzotarrek irailaren 3an, Errioxako Biasterira (La Guardiara) irteera eginda.
Egun osoko plana izango dute bertan. Goizeko 08:30etan abiatuko dira Loidi edo Bordaberritik, eta Errioxako bidean egingo dute hamaiketakoa. Ondoren, Biasterira iristean, bi aukera izango dituzte: herria bisitatzea edo Eguren Ugarte bodega bisitatzea. Bodega «ikusgarria» dela diote, eta ohiko bisitaz gain, mahastiak eta jardinak ikusiko dituztela. Bukatzeko, bodega berean egingo dute bazkaria.
Autobusa, elkartearen esku
Abuztuaren 27ra arte izango dute auzotarrek izena emateko aukera, eta Auzo Elkarteko kideren batekin hitz egin beharko dute horretarako. Prezioari dagokionez, autobusa elkarteak jarriko du, eta otordua besterik ez da ordaindu beharko: haurrek, 15 euro; helduek, 40 euro.