Partidu egunaren bezperan aitortzen zion Kronikari Endika Barrenetxea hernaniarrak: «sakea tantoaren %70 da, Buruz Burukoan». Eta sake oso ona daukala ere bai. Baina baita restatzaile txarrena dela ere, Ligaxka jokatzen ari diren lau erremontisten artean.
Horixe gertatu zitzaion atzo Buruz Buruko Ligaxkako aurreneko norgehiagokan; ikaragarrizko partidu bizia jokatu zuen Utergaren kontra, eta tanto bakarreko aldearekin galdu zuen.
Azken sakera arte, eutsi
Barrenetxea IV hasi zen aurrea hartzen, 7 eta 6, baina hortik aurrera, Utergak jarri zuen erritmoa. Hernaniarra, berriz, ez zen ohi bezalako sake onak egiten ari, eta Utergak sei puntuko aldea ateratzea lortu zuen.
Ez zuen etsi, ordea, eta Utergari nekea nabaritzen hasi zitzaionean jo zuen erasora Barrenetxea IVk. Berdindu egin zuten 25na, eta berriro ere, 28na. Aurrea hartu zuen orduan Barrenetxea IVk, 29 eta 28.
Baina erresto bikain batek, eta azken sake ederrak, Utergari eman zioten garaipena. Lau puntu bildu ditu horrela, eta hernaniarrak, bi.