Udalak jaietako programan argitaratutako agurrean azpimarratu du «guztiona» dela, «Goizuetako Festak lasai ospatzeko eskubidea. Ez dugu inolako erasorik onartzen. Ez onartu zuk ere!».
Eta zentzu horretan, hainbat kanpaina jarri dituzte martxan Laga Gizarte Zerbitzuen Mankomunitateak eta Goizueta eta Aranoko Prebentzio eta Berdintasun Batzordeak, jaietan errespetua, berdintasuna, eta kontsumo arduratsua sustatzeko.
Errespetua aldarrikatzeko, pegatinak
Kanpaina horietako bat da Errespetuz blai! Honekin, hiru helburu lortu nahi dira: gehiegizko kontsumoa ekiditea, kontsumo arduratsua bultzatuz; emakume eta gizonek jaiak baldintza berdinetan gozatzea, eraso sexisten prebentzioan arreta jarriz; eta teknologia berrien zentzuko erabilera areagotzea.
Hori lortzeko, eta kanpaina «interaktiboagoa» egiteko, jolas bat proposatu da: Aranon egin zen bezala, Goizuetako festetan 10 pegatina mota izanen dira eskura hainbat puntutan, norberaren eg edo nahien arabera, momentuan egokiena aukeratzeko. Horrelako leloak izanen dituzte: Gaur dantzatu nahi dut, Mozkordorik ez!, Ligatzeko prest! edota Aparkatu mugikorra... eta begietara begiratu.
Era berean, beste udako kanpaina batzuekin bat eginez, Laga Gizarte Zerbitzuak Dena ez da Txantxa kanpainaren berri ematen ere lagundu du, besteak beste, «ikusarazteko ez kontsumitzea pertsona askoren erabaki dela».
Kantuak, denen gozamenerako
Bestalde, Laga Gizarte Zerbitzuak aurten bigarrenez antolatu du Zuk Aukeratu Zuk Dantza Egin lehiaketa.
Honen helburua da denen artean erabakitzea zein abesti entzun nahi diren festetan. «Dibertigarriak, dantza egiteko modukoak eta giro ona sortzen duten abestiak izanen dira, ez erasotzaileak». Jasotako proposamen guztiekin abesti zerrenda osatu dute, eta taberna eta txosnetan banatuko dute, datozen festa egunetarako.
Proposamen onenak egin dituztenek, berriz, jasoko dute sariren bat!
Ondo pasatzeko aukerarik ez du inork faltako, beraz, errespetua oinarri bada.