EUSKAL Jaiak bihar hasiko dira Pirritx, Porrotx eta Marimototsen ikuskizunarekin, arratsaldeko 18:00etan Atsegindegin. ‘Hernani’ Musika Eskola Publikoko akordeoi taldeak antolatu du, eta lehen aldia da, emanaldia Euskal Jaien barnean uztartzen dela; sarrerak 7 euro balio ditu.
Etzitik aurrera, egitarau zabalagoa garatuko da. Abeltzain azoka eta baserriko lanbideen erakustaldia egongo dira Tilosetan, eta talo goxoak jan ondoren, antzinako jokoen ekitaldia egongo da. Proba desberdinak antolatu dira, eta herriko neska eta mutilez osaturiko bi talde arituko dira lehian, hainbat jokotan.
Suiladunen laisterra berreskuratuko da
Lehenengo saioan gaztetxoek hartuko dute parte lokotx biltzean, marmita eramatean, zaku karreran, kontrabandistan, sokatiran, sagar biltzen kixkiarekin, zirrindola laisterran, eta aurten lehen aldiz, morkots bilketan matxardarekin; garai bateko jokuak dira denak. Bigarren saioan, helduen txanda izango da. Haiek, arropa garbitzea eta suiladunen laisterra ere egingo dute. Orain 100 urte baino gehiago Hernanin egiten ziren suilak (gaztelaniaz herrada) ura ga-rraiatzeko erabiltzen ziren; eta proba honetan, suilak urez beteta buruan jarri, eta finkatutako ibilbidean ahal den azkarren aritu behar da.
Musika bandaren kontzertua, larunbatean
Larunbateko beste bi ekitaldi aipagarri dira, arratsaldean egingo diren haurrentzako tailerrak, jolasak eta txokolate jatea Plaza Berrin; eta Musika Bandaren emanaldia udaletxeko arkupetan. Hernaniko Musika Bandak, 19:45etan eskainiko du kontzertua, eta Euskal Herriko hamaika abesti joko dituzte.
Artisau azoka, igandean
Igandean, azken egunean, XXXVIII Pablo lasa Artisau Azoka jarriko dute Plaza Berrin, 10:00etatik aurrera.
Abenduan egiten zen, baina Euskal Jaietara pasatzea erabaki da. Gabiltza Elkarteak antolatzen du, eta euskal artisauak izango dira gehienak: 12 gipuzkoar, bizkaitar bat eta zaragozarra bestea.