Hara eta hona dabiltza udaran zehar Axeriak Mendi Lasterketa Taldeko korrikalariak; herenegun Andoainen izan ziren, Buruntzako San Rokeko kros igoeran, eta Ana Rodriguez taldekide hernaniarra hirugarren sailkatu zen emakumezkoen artean, 01:25:20 denbora eginda. Bere aurretik, Lourdes Colomo izan zen aurrenekoa, eta Nerea Amilibia, bigarrena.
Aldaketak, ibilbidean
Aurreneko sailkatuek, eta baita beste partehartzaile guztiek ere, 11,5 kilometroko ibilbidea osatu behar izan zuten herenegun, aurten gainera, aldaketa batzuekin. Azaldu dutenez, «ibilbidea luzatu eta gogortu egin dute antolatzaileek, eta onerako izan da, lasterketak ikusgarritasunean irabazi duelako».