Urrian hasiko dira kiroldegiko ikastaro berriak ematen. Batzuk, ikasturte osokoak izango dira, ekainera arte; beste batzuk, urritik abendura artekoak. Eta izango dira urtarriletik martxora bitartean eta apiriletik ekainera bitartean emango direnak ere.
Baina denetan, aurretik eman behar da izena, eta gaurkoa da horretarako azken eguna, kiroldegiko bulegoan.
Guztira, 23 ikastaro daude aukeran. Lehorrean egitekoak, aerobik, pilates, indoor walking, ziklo indoor, mantentzeko gimnasia, konbinatuak, karate, zunba, TRX eta training. Uretakoak, berriz, haurtxoentzakoa, haurdunentzakoa, helduen hastapenekoa, mantentzeko igeriketa eta aquagym, eta adinaren arabera banatuta, 2001etik 2014ra bitartean jaiotakoentzako beste zortzi ikastaro.
Zozketa, bihar
Aurten, plazak banatzeko ez da kontuan hartuko zein ordenetan eman den izena ikastaroetan. Horren ordez, plazak baino eskaera gehiago izan diren kasuetan zozketa egingo da bihar, 12:00etan kiroldegiko bulegoan.
Era berean, plazak libre geratuz gero, hilaren 16tik aurrera izango da aukera berriro, izena emateko. Kasu horretan, taldeak bete arte, eta izenemate ordena errespetatuz.