Duela 25 urte egin zen herri antzerkia berreskuratu, eta Goizuetan bazen hura, Goizuetan bada bihurtu dute aurtengo udaran, herriko musikari, aktore eta laguntzaileek. Horien artean, eskolako hainbat umek ere hartu dute parte, eta hain juxtu horietxek izanen dira astelehenean Amabirjinetako festei hasiera emanen dien itxaferoa pizteko arduradunak, eskolako gainontzeko umeen ordezkari. Horietxek baitira, Goizueta(n) izanen dela bermatuko dutenak.
Etorkizunarekin gehiegi kezkatu gabe, ordea, fiestak etorri zain dira Paula, Aiora, Itxaso, Beñat, Aitzol eta Jon (argazkian hurrenez hurren); Lo-renak ere piztuko du haiekin, itxaferoa, elkarrizketara etorri ezin izan badu ere. Nola, ez daukate oso garbi oraindik... «Denon artean nola eginen dugu, zazpi metxerorekin sua piztu?».
«Zezenak ikusteko igoak ginen lehendik, udaletxera!»
Herri antzerkian ibilita, seguru aise moldatuko direla udaletxeko balkoian ere. «Antzerkian ateratzeko konbentzitu egin gintuzten! Baina azkenean, gustora aritu ginen. Erraza izan zen. Ez genuen entsaio askorik behar izan».
Hala ere, badirudi oraindik erdi lotsatuta aterako direla goizuetarren aurrera. «Hitz batzuk esan?», galdetzen dute. «Sua piztearekin, nahiko! Zuek hitz eginen duzue!», botatzen diote erronka, elkarri. Baina tokia behinik behin, ondo ezagutzen dute. «Zuriñe Lujanbiok (zinegotzi ohia) esan zigun txupinazoa botatzeko. Ilusioa egin zigun. Txupinazoa botatzeko ez, baina lehendik igoak ginen udaletxera, zezenak ikusteko!».
Behin itxaferoa piztuta, berehala jai giroan murgiltzeko asmoa daukate. «Lagunengana jaitsiko gara zuzenean. Eta buruhaundiak bazilatuko ditugu!».
Pilota partiduak eta musika, festa lehertu aurretik
Itxaferoari su eman aurretik, ordea, festa giroan murgilduta ibiliko dira denak, bihar bertan. Izan ere, Umeen Eguna izanen dute.
Itxaso, adibidez, Irumaita txarangarekin aterako da, urtero bezala, trikitixa jotzen. Beñatek, ordea, aurtengoan kale eginen duela dio. «Txindatekin atera izan naiz, baina aurten ez!». Tabernako lanaren aitzakia jartzen du, brometan... «Oxeguardakoa da-eta!».
Parrandarako gogoak, ordea, aitzakiek baino pixu haundiagoa dauka... «Espuma festan ez gara gehiegi ibiltzen... Baina pilota partiduak ikustera joanen gara!».
«Peñaren eguneko zezenak dira ikusteko onenak; grazia gehiago daukate!»
Fiestetan zezenak, eta... zezenak!
Biharko Umeen Egunak, beraz, fiestetarako motorrak berotzeko balioko die, behin hasita, beste zenbat ekitalditan gozatzen duten ere aitortu baitute. Denen artean, bat bada, nabarmena... «Tiro pitxonen ibiltzen gara. Musika ere gustatzen zaigu; dantzan aritzea edo... Baina onena, zezenak ikustea! Gutxiegi daude!», diote. Bat baino gehiago dira, ordea, eta denak ez omen dira, berdinak: «Peñaren eguneko zezenak dira ikusteko onenak; grazia gehiago daukate!».
Gainontzean, herriaz gozatzeko egunak izanen dituzte. Izan ere, Goizuetak ze abantaila dituen ez dute oso argi ikusten baina... «Batzuetan hutsa izaten da herria! Baina besteetan, erraza da topo egiteko!». Eta hara non, fiestetan herrian bizi ez diren lagunekin ere egiten dute topo; «askok familiako etxea izaten dute hemen». Eta horrela, «kalean afaldu, ordu txikietan juergan ibili...». Hortxe, pagotsa ederra!