Ekainaren erdialdean Hernani Errugbi Elkarteak antolatutako Garagardo Azoka berezia izan zen aurtengoan, batez ere, Pasaportes Para Siria elkartearentzat. Izan ere, beren elkartea eta errefuxiatuen arazoa ezagutarazteko aukera izateaz gain, behin Azoka bukatuta, 800 euroko laguntza eman zion Errugbi Elkarteak, Grezian laguntzeko: «eskerrak Errugbi Elkarteari gurekin elkarlanean aritzeagatik, eta hondar-ale hau jartzeagatik», adierazi dute.
Garbiketa produktuak, squadetarako
Eta dagoeneko egin dute inbertsioa: «SOS Refugiados elkarteak Ellenikon kudeatzen duen biltegirako, garbiketako produktuak erosi ditugu», jakinarazi dio Kronikari Itziar Villalbak, Pasaportes Para Siriako kide hernaniarrak.
Atenasen egon da bera, eta egoera ikusita erabaki dute zertan inbertitu Errugbi Elkarteak emandako dirua: «biltegi horretan dagoena Atenasen dauden squadetan (edo eraikin okupatuetan) zehar banatzen du SOS Refugiados taldeak, eta beraz, 3.500 errefuxiatu inguruetara iristen da. Han nengoela esan zidaten garbiketarako produktuak zirela beharrezkoak, ez zeuzkatela, eta beraz, supermerkatu batera joan, erosi, eta squadetan zehar banatu genituen».
Pasaportes Para Siria bezalako elkarteen laguntzarekin betetzeaz gain, «Ellenikoko biltegian biltzen dute Espainiatik jasotzen duten guztia. Eta batez ere, Euskaditik iristen da laguntza; beraiek diote solidarioenak garela».
Egoera, aldatuta
Dena den, Villalbak dio egoera aldatzen ari dela: «squadak desagartarazi nahi dituzte, eta errefuxiatuak ikusezinak egiteko, kanpoetara eramaten ari dira».
Hori saihesteko, Victoria proiektua jarri du martxan SOS Refugiadosek, eta Pasaportes Para Siriak babestu du: «eguneko zentro bat da, errefuxiatuek jan eta ekintzak egin ditzaten. Eraikina alokatu egin da, bota ez ditzaten, baina, noski, alokairua ordaindu eta mantendu behar da...».