Donostiako Zinemaldiaren 65garren edizioan estreinatuko du Jon Garaño astigartarrak bere pelikula berria. Handia izenburupean, Aitor Arregirekin batera zuzendu du, eta ez du nolanahi aurkeztuko; Zinemaldiko Sail Ofizialean lehiatuko da, Urrezko Maskorra helburu.
Altzoko Haundia, oinarri
XX. mendearen hasieran kokatzen da pelikularen istorioa. Orduan, Altzon bazegoen gizaseme bat, Migel Joakin Eleizegi, Altzoko Haundia deiturikoa, 2,27ko altuera zuena. Arraroa zen garai hartan, eta horrek munduan barrena ibiltzera eraman zuen. Pertsonaia horretan oinarritzen da, hain zuzen, pelikula, baina garaiko gizartearen erradiografia osoa egiten du, baita ere.