Badajozko espetxean hil zen herenegun Kepa Del Hoyo preso galdakaoztarra, bihotzekoak jota, eta hori salatzeko, hainbat mobilizazio burutzen ari dira egunotan. Atzo izan zen horietako bat Zinkonean, eta bertan irakurri zuen Hernaniko Sortuk Nahikoa da. Presoak behingoz kalera testua. Argi adierazi zuten: «Kepari legea aplikatu izan baliote, seguruenik, ez genuke gaur gogoratu beharko. Kalean egongo litzateke zigorraren bi herenak beteta zituelako».
Ildo horretatik gogoratu zuten, «Euskal Herritik ehunka kilometrora, isolatuak, baldintza okerretan eta dagozkien eskubideak errespetatu gabe mantentzen dituzte. Keparen heriotza ez da ausaz–koa izan, politika horren ondorio zuzena baita. Espainiar estatuak gerra eszenatoki bat betikotu nahi du, herri honekin daukan arazo politikoa ezkutatu nahian. Eta horretarako euskal presoak erabiltzen ditu, zitalkeriaz».
Horren aurrean, Sortu elkarlanerako prest azaltzen da: «dei egiten diegu eragile politiko, sozial eta instituzionalei elkarlanerako, Kepa gatazka honek utzi duen azken hildakoa izan dadin. Herri bezala egin behar dugu lan Estatuaren posizioa mugiarazteko».
Bi zita, datozen egunetan
Kepa del Hoyoren heriotza salatu eta elkartasuna adierazteko bi zita jarri dituzte: gaur, 13:00ean, egingo diote aurreneko agurra Galdakaoko tanatorioan; eta larunbatean, manifestazio nazionala izango da Galdakaon, 18:00etan abiatuta. Bigarren honetarako autobusa aterako da Hernanitik, eta apuntatzeko zerrenda Garin tabernan jarri dute.