Oporraldirik egin gabe, odola emateko zita jarri du Hernaniko Odol Emaileen elkarteak gaurko. Ohi bezala, anbulategian izango da odola emateko eta organu-emaile egiteko aukera, arratsaldeko 18:30etatik 20:30etara.
Azkenealdian, «eskas»
Gaurko zitaren aurrean, Hernaniko boluntarioek udarako oporraldian dagoen premia azpimarratu nahi izan dute, eta kezkatuta azaldu dira, azken hilabeteetan emaile kopuruak behera egin eta «eskas» dabiltzalako. Hori dela eta, deia egin diete herritarrei, gaurkoan anbulategira bertaratzeko.
«Odol-erretserbak jaitsi eta beharrizanak hazi egiten dira udaran»
Eusko Jaurlaritzak, kanpaina berezia
Kezka hori, Euskal Herri osora zabaltzen da udako denboraldian; horregatik, kanpaina berezia jarri zuen martxan Eusko Jaurlaritzako Osasun arloak uztailaren erdialdean: Eman odola, nigan bizi. Irailera arte luzatuko da kanpaina berria. Helburua da, hain zuzen, gizarteari «balio positibo eta humanitarioetan oinarritutako mezua helaraztea», azaldu zuen Jon Darpon Osasun sailburuak kanpainaren aurkezpenean: «lotura emozionala sortu nahi izan dugu odola eman eta jasotzen duten pertsonen artean, euskal gizarteak bere egin duen elkartasun-balioa nabarmenduta».
Hala, herritarrak animatu nahi dituzte, «erne egoteari ez uzteko, odol-erreserbak jaitsi eta beharrizanak hazi egiten baitira udaran».