Festetako egun haundia, Santio eguna bera dute gaurkoa, Astigarragan eta Aranon. Azken honetan, gainera, gaur bertan bukatuko dira festak. Astigarragan, berriz, beste egun haundi bat geratuko zaie oraindik; San Ana.
Dianarekin hasita, meza, soka-dantza eta musika
Astigarragan Norberto Almandoz musika eskolako eta Txirriskla taldeko txistulariek esnatuko dute eguna, 09:30etako dianarekin. Santioko ermitan ere joko dute gero, 11:00etan meza nagusia bukatuta.
Eguerdiko 12:00etan, berriz, Udalbatzak soka dantza dantzatuko du Foru Plazan, eta 13:00ean, Imperial Elegancia Mexicana mariatxi taldea abiatuko da Norberto Almandoz plazatik.
Arratsaldean segiko du festak: 18:00etan, Astigar taldearen dantza erakustaldia izango da Txomiñenea frontoian; 19:00etan, Maialen Akizu eta Xamoa bertsolariak, Gazte Asanbladaren txosnan, eta ordu berean, Euskal Herriko Izaki Mitologikoen Kalejira, Galtzaurko zubitik hasita (euriarekin, ikastolan); 19:30etan, Santa Ana eguneko idien paseoa Foru plazan; 23:00etan Oihan Vega DJa J.B. plazan eta Anai eta Trikidantz talde txosnan; eta 24:00etan, Larrain dantza Foru Plazan.
Aranon, azken eguna
Aranon, berriz, pelota partiduekin, 12:00etan hasiko dute eguna: Huizi-Lizeaga aranoarrak, Salaberria-Apezetxea goizuetarren kontra. Aizkoran ariko dira gero, 17:30etan, Aizarnako Luis Txapartegi eta Ezkurrako Moises Gogortza, Errezilgo Arria V eta Aranoko Xauxar baserriko Joseba Izetaren kontra. Eta bukatzeko, bertsolariak izango dira 19:00etan: Maialen Lujanbio, Unai Agirre, Eneko Lazkoz eta Jexux Mari Irazu.